पथरी/ प्रतिनिधिसभा निर्वाचनको मिति नजिकिँदै गर्दा मोरङ निर्वाचन क्षेत्र नं. ३ मा चुनावी सरगर्मी निकै बढेको छ। नेकपा एमालेका तर्फबाट सूर्यध्वजावाहक उम्मेदवार इरनकुमार राईको पक्षमा युवाहरूको उत्साहजनक समर्थन देखिएको छ।
शनिबार पथरी शनिश्चरे नगरपालिका–१० स्थित त्रिबेणी चोक उत्तरतर्फको गाउँमा आयोजित घरदैलो कार्यक्रममा युवाहरूको विशाल समूह स्वतःस्फूर्त रूपमा सहभागी भएको थियो ।
नाराबाजीसहित गाउँ छिरे युवा
घरदैलो अभियानका क्रममा स्थानीय युवाहरूले “नेकपा एमाले जिन्दावाद” र “भोट केमा? सूर्यमा” जस्ता चर्का नारा लगाउँदै गाउँ परिक्रमा गरेका थिए। सहभागी युवाहरूले अबको नेतृत्व विकासप्रेमी र युवाको मर्म बुझ्ने हुनुपर्ने भन्दै राईको पक्षमा माहोल सिर्जना गरेका छन् ।
के भन्छन् उम्मेदवार राई ?
घरदैलोका क्रममा मतदातासँग प्रत्यक्ष संवाद गर्दै उम्मेदवार इरनकुमार राईले आफू गफभन्दा काममा विश्वास गर्ने बताए। उनले भने- “हाम्रो प्राथमिकता पूर्वाधार विकास, गुणस्तरीय शिक्षा र स्वास्थ्य नै हो। तर, सबैभन्दा महत्त्वपूर्ण कुरा युवाहरूलाई स्वदेशमै रोजगारी सिर्जना गर्नु हो। म मोरङ–३ का युवाहरूको उर्जालाई समृद्धिको आधार बनाउने प्रतिबद्धता व्यक्त गर्दछु ।”
प्रमुख एजेन्डा जसमा युवाको चासो छ:
रोजगारी सिर्जना: स्थानीय स्तरमै सीपमूलक तालिम र अवसर।
पूर्वाधार विकास: अधुरा सडक र ढल निकासको पूर्णता।
स्थायित्व: राजनीतिक स्थिरता र सुशासनको प्रत्याभूति।
चुनावी रौनक: पथरी शनिश्चरेका विभिन्न टोल र बस्तीमा दैनिकजसो भइरहेका यस्ता भेटघाटले एमालेको पक्षमा माहोल बलियो बन्दै गएको स्थानीय मतदाताहरूको दाबी छ। युवाहरूको यो सक्रियताले अत्यधिक मतसहित विजयी हुने उम्मेदवार राईको विश्वास छ ।
