रंगेली, मोरङको रंगेलीका किसानहरु एकबोरा मल लिनलाई रातभरको कठ्याङ्ग्रिदो चिसोमा १० घण्टा लाइन बसिरहेका छन् ।
एकबोरा मलाका लागि रातीको १ बजेदेखि नै लाईनमा बसेका किसानले विहान १० बजे मात्रै एकबोरा मल पाउछन् । किसानलाई एक बिगाह खेतका लागि ४ बोरा डीएपी, २ बोरा पोटास र ४ बोरा युरिया आवश्यक पर्छ तर रातभर लाइन लागेका रंगेली ५ का किसानले यतिबेला १ बोरा मल पाउदैछन् ।
रंगेलीमा आवद्ध र जैनपुर कृषि सहकारी गरी २ वटा सहकारीले मल बितरण गर्दै आएका छन् । सो मल लिनका लागि कृषकले २ दिन लगाएर वडा कार्यालयबाट कुपन लिनुपर्ने बाध्यता छ । वडामा समेत कहिले अध्यक्ष त कहिले सचिव नभेटिँदा कुपन पनि पाउन मुस्किल रहेको किसानहरू बताउछन् ।
यता सहकारीमा पनि जैनपुर सहकारीले मल वितरणमा लापर्वाही गर्ने गरेको किसानको गुनासो छ । आबद्ध सहकारीले मकै खेती गर्ने किसानहरुलाई हालसम्म ९ सय ७८ बोरा डीएपी र ९ सय ४९ बोरा यूरिया वितरण गरिसकेको छ भने जैनपुर कृषि सहकारी संस्थाले मल वितरण गर्न नसकेको कृषकहरूको गुनासो छ ।
