मोरङ, चर्चित गायक महेश बुढाथोकीले मागे संग्रान्तीको अवसरमा मगर समुदायको हुर्रा भाकामा आधारित गीत ’रामसाईली’ सार्वजनिक गर्ने भएका छन् । विशेषतः “काफल गेडि कुटुक्कै“ गीतबाट ख्याति कमाएका बुढाथोकीको यो नयाँ गीतलाई दर्शकहरूले प्रतिक्षा गरिरहेका छन् ।
यसपटकको म्युजिक भिडियोमा बुढाथोकीले निर्देशकको रूपमा ईश्वर दुलाललाई डेब्यु गराएका छन् । दर्जनभन्दा बढी म्युजिक भिडियोमा सहायक निर्देशकको रूपमा अनुभव बटुलेका दुलालले यस गीतमा आफ्नो निर्देशन कौशल प्रस्तुत गर्ने भएका छन् ।
दुलालले आफ्नो अनुभव बाँड्दै भने, “यो मेरो पहिलो निर्देशन हो, र म यसलाई विशेष बनाउन प्रयास गरि रहेको छु । ’रामसाईली’ केवल गीत मात्र होइन, यो हाम्रो संस्कृतिलाई प्रस्तुत गर्ने गतिलो माध्यम हो । म्युजिक भिडियोलाई सांस्कृतिक मौलिकता र आधुनिक प्रस्तुतिको राम्रो सन्तुलनमा बगाउने प्रयास गरिएको छ । अग्रज गायक÷श्रष्टा महेस बुढाथोकीसँगको सहकार्यले मलाई हौसला दिएको छ ।”
दुलालका अनुसार, म्युजिक भिडियोमा मगर समुदायका मौलिक चाल, भेषभूषा र परम्पराहरूलाई जीवन्त रूपमा प्रस्तुत गरिएको छ । ‘रामसाईली’ सँगै निर्देशक दुलालको करियरले नयाँ मोड लिने अपेक्षा समेत गरिएको छ । सो गीतको कथा निर्देशक दुलालले नै तयार पारेका छन् ।
२५ गते मोरङको बाँसेचौरी र आसपासको क्षेत्रमा खिचिने म्युजिक भिडियोलाई कोशी भिजनले छायाङ्कन तथा सम्पादन गर्ने छ ।
