बर्सेनि नयाँ विषय थप्दै पञ्चायत मावि, पहिलो पटक पथरीमा ललितकलाको पढाइ

बर्सेनि नयाँ विषय थप्दै पञ्चायत मावि, पहिलो पटक पथरीमा ललितकलाको पढाइ

केशव निरौला, पथरी

‘यसपालि पनि कक्षा ११ मा नयाँ विषय आएको छ अरे, हो ?’ एक नवआगन्तुक विद्यार्थीले सोधिन् ।

विद्यालयका प्रधानाध्यापकको जबाफ थियो” ‘हो यो वर्षदेखि कक्षा ११ मा ललितकलाका विषय पढाउने तयारी छ । त्यसको लागि नयाँ भर्ना आवेदन पनि खुलाएका छौँ ।’

माथिको संवाद अंश थियो मोरङको पथरीशनिश्चरे–१ मा रहेको पञ्चायत माविका प्रधानाध्यापक अर्जुनकुमार बुढाथोकी र नवआगन्तुक विद्यार्थीबीचको ।
यो प्रतिनिधि संवादांशबाट पुष्टि हुन्छ कि पञ्चायत माविले प्रत्येक वर्ष थप नयाँ विषयको पठनपाठन गर्दै आएको छ । यही क्रममा विद्यालयले शैक्षिक सत्र २०७७÷०७८ का लागि ललितकला (फाइन आटर््स) विषय समूहमै कक्षा ११ मा नयाँ भर्ना आवेदन फारम खुलाएको हो । ललितकला समूहअन्तर्गत विद्यालयले ऐच्छिक विषयमा मूर्तिकला, चित्रकला र कम्प्युटरको पठनपाठन गर्ने भएको छ । नयाँ पाठ्यक्रमअनुसार अब अनिवार्य नेपाली (००१), अनिवार्य अङ्ग्रेजी (००३), अनिवार्य सामाजिक अध्ययन तथा जीवनोपयोगी शिक्षा (००५), ऐच्छिक मूर्तिकला (१३३), ऐच्छिक चित्रकला (४२७) र ऐच्छिक कम्प्युटर विज्ञान (२३१) गरी ६ विषय समूहमा ललितकला पठनपाठन हुनेछ । माध्यमिक शिक्षा पाठ्यक्रम, २०७६ ले दुईओटा ऐच्छिक समूहमा मूर्तिकला विषय समावेश गरेको हुँदा त्यो परिमार्जन भएमा पुनः अर्को विषयसमेत विद्यार्थीले रोज्न पाउने विद्यालयका प्रधानाध्यापक अर्जुनकुमार बुढाथोकीले जानकारी दिनुभयो । पाठ्यक्रम प्रारूपमा ऐच्छिक प्रथमअन्तर्गत कोड नं. १३३ र ऐच्छिक तृतीयअन्तर्गत कोड नं. ३२७ मा समानरूपमा मूर्तिकला विषय राखिएको छ ।

प्रत्येक वर्ष नयाँ विषय

यस पञ्चायत माविले सम्भव भएसम्म प्रत्येक वर्ष नयाँ विषय थप गर्दै पठनपाठन गर्ने नीति अख्तियार गरेको छ । उसले विद्यार्थीको रुचि, चाहना, समयको माग र आवश्यकताअनुसार शिक्षकको समेत व्यवस्थापन हुने गरी नयाँनयाँ विषय पढाउँदै आएको पाइन्छ । सामुदायिक विद्यालयतर्फ विज्ञानसमूहबाट देशकै उत्कृष्ट नतिजा निकाल्न सफल हुँदै आएको यस विद्यालयले गत वर्षदेखि कक्षा ११ मा कानुन समूहका विषय पठनपाठन गर्दै आएको छ । विराटनगरबाहिर पहिलो पटक कानुन समूहका विषय पढाउने पञ्चायत मावि नै पहिलो हो । कानुन समूहमा उसले कक्षा ११ मा अनिवार्य नेपाली र अङ्ग्रेजीसँगै ऐच्छिकरूपमा ३ ओटा कानुन विषय पढाएको पाइन्छ । गत वर्षमात्रै कानुन समूहमा ७२ जनाले भर्ना गरी निरन्तर अध्ययन गरेको विद्यालय स्रोतले जानकारी दिएको छ ।

नयाँ विषय समूह थप्ने क्रममा विगतदेखि अहिलेसम्ममा विद्यालयले ६ ओटा विषय समूह थपिसकेको छ भने ललितकला सातौँ विषय समूहमा परेको छ । उसले विज्ञान, व्यवस्थापन, शिक्षा, मानविकी, प्राविधिक धारतर्फ सिभिल इन्जिनियरिङ र कानुन समूहका विषय पढाउँदै आएको छ भने यसवर्षबाट ललितकलाका विषय सुरु गर्दै छ । स्थानीय स्तरमै विद्यार्थीले आफ्नो रुचि र चाहनाअनुरूप विषय छानेर पढ्न पाउने वातावरण मिलाउँदै गएको विद्यालय व्यवस्थापन समिति अध्यक्ष आइतकुमारी तुम्बापोले बताउनुभयो । विद्यालयले आगामी वर्षहरूमा पनि समसामयिक र व्यावहारिक ठानिएका विषयलाई क्रमशः थप गर्दै लाने जनाएको छ । भौतिक संरचनाको पर्याप्तता र शिक्षक व्यवस्थापन गर्न सहज भए आगामी वर्ष आमसञ्चार तथा पत्रकारिता, होटल मेनेजमेन्ट वा अन्य कुनै पनि व्यावहारिक एवम् जीवनोपयोगी विषय थप्ने योजना रहेको विद्यालयका प्रअ बुढाथोकीले बताउनुभयो ।
पहिलो पटक पथरीमा ललिलकला

पञ्चायत माविमा कक्षा ११ मा अध्यापन हुने ललिलकला समूहका विषयहरू सम्भवतः प्रदेश नं. १ मै पहिलो पटक मानिन्छ । काठमाडौँ उपत्यकाका केही विद्यालयमा पढाइ हुँदै आएका मूर्तिकला, चित्रकलाजस्ता विषयलाई पूर्वमा पञ्चायत माविले नै पहिलो पटक प्रवेश गराएको शिक्षासम्बद्ध जानकारहरूको भनाइ छ । यस विषयमा विद्यालयका प्रअ बुढाथोकी भन्नुहुन्छ” ‘पथरीमा ललितकला समूहअन्तर्गतका विषय पढाइ हुने वातावरण बनेको छ । पोहोरदेखि कानुन समूहमा विषय पनि पढाइ भइरहेको छ । सम्भव भएसम्म बर्सेनि थप हुने यस्ता विषयहरूलाई क्षेत्र तोकेर पहिलो वा दोस्रो किन भनिरहनु ? ।’

नमुना विद्यालयमा छनोट भएको पञ्चायत माविले बर्सेनि नयाँ विषय थपेर शैक्षिक उन्नयन गर्दा पथरीशनिश्चरे नगरलाई नै ‘शैक्षिक हब’ बन्न प्रमुख सहयोग पुगेको नगरप्रमुख दिलिपकुमार (किशोर) राई बताउनुहुन्छ । अहिले विद्यालयले शैक्षिक विकासमात्रै होइन, भौतिक विकासतर्फ पनि ३ ओटा अत्याधुनिक भवन निर्माण कार्यलाई तीब्रताका साथ अगाडि बढाइरहेको छ । २०३६ सालमा स्थापित यस विद्यालयमा हाल २ हजार ३ सयभन्दा बढी विद्यार्थी अध्ययनरत छन् ।

सम्बन्धित खवर