राजेन्द्र महतो, लहान
भारतले प्याज निर्यातमा रोक लगाएसँगै नेपालमा बढी मूल्यमा किनबेच हुन थालेको छ । यस्तो कार्यमा संलग्न भएको अभियोगमा बुधबार सिरहामा साढे सात हजार किलो प्याजसहित पसलका ३ जना सञ्चालक पक्राउ परेका छन् ।
पक्राउ पर्नेमा गोलबजारमा रहेको जय लक्ष्मी सब्जी भण्डार पसल तथा गोदामका सञ्चालक मिर्चैया नगरपालिका ५ बस्ने ४४ वर्षीय उमेशप्रसाद साह, मिर्चैयास्थित रहेको जय मातादी सब्जी भण्डारका सञ्चालक विनोदकुमार साह र लहानस्थित गंगा ट्रेडर्सका संचालक रामनारायण नायक रहेका छन् ।
प्याजको कालोबजारी भइरहेको विशेष सूचनाको आधारमा इलाका प्रशासन कार्यालय लहानका प्रतिनिधिसहित उद्योग वाणिज्य संघका प्रतिनिधि, स्थानीय जनप्रतिनिधि तथा जिल्ला प्रहरीबाट खटेको टोलीले सिरहाको मिर्चैया, गोलबजार र लहानका बजारको पसल र गोदाममा छापा मारी ७ हजार ४ सय ४० किलो प्याजसहित ३ जना सञ्चालकलाई प्रहरीले नियन्त्रणमा लिएको जिल्ला प्रहरी कार्यालय सिरहाले जनाएको छ ।
प्रहरीले ती सञ्चालकहरुलाई नियन्त्रणमा लिई गोदाम सिल समेत गरेर थप अनुसन्धान गरिरहेको जिल्ला प्रहरी कार्यालय सिरहाका सूचना अधिकारी तथा डीएसपी विनोद घिमिरेले जानकारी दिए । भारतले प्याज आयातमा प्रतिबन्ध लगाएपछि नेपालमा व्यापारीले प्याजको मूल्य ह्वात्तै बढाएर कालो बजारी सुरु गरेका छन्।
