सिन्धुली जिल्लाको प्रशिद्ध धार्मिकस्थल माईस्थानमा हिउद मौसमसँगै वनभोज खान आउनेको लर्को लाग्दै गएको छ ।
कमलामाई नगरपालिका–५स्थित कमलामाई मन्दिरको दर्शनसँगै माईस्थानमा बनभोज खान आउनेको लर्को लागेको स्थानीय बासिन्दा बताउछन् । बीपी राजमार्ग निर्माणसँगै यातायातको सुविधा पुगेपछि तराईका जिल्लाबाट समेत वनभोज खान आउने बढ्दै गएका स्थानीय बासिन्दा बुद्धी श्रेष्ठ बताउनुहुन्छ ।
उहाँले भन्नुभयो, ‘दैनिक १०/१२ हुरी पिक्नीक खान नआएको दिन हुदैन । कहिले त पिक्नीक खान आउनेले बगर नै छपक्कै ढोकेको हुन्छ ।’ कमला नदी र गौमती नदीको दोभानमा रहेको कमलामाई मन्दिरमा प्रत्येक बर्ष माघे सङक्रान्तिका दिन ठूलो मेला लाग्दै आएको उहाँले जानकारी दिनुभयो । माघे सङ्क्रान्तिका दिन लाग्ने मेला भर्न छिमेकी जिल्लाहरु सर्लाही, महोत्तरी, धनुषा, सिरहा, रौतहट, बारा, पर्साका अतिरिक्त भारतको विभिन्न सहरबाट समेत श्रद्धालु भक्तजनहरु आउने गरेका छन् ।
भक्तजनहरु कमलामाई मन्दिरको दर्शनसँगै पाठी ल्याएर ब ली दिने र पिकनिक खाएर रमाईलो गरी फर्किने गरेका पनि स्थानीय बासिन्दा बताउछन् । अन्य समयमा भन्दा पनि माघ महिनाभरी नै कमलामाई मन्दिरको दर्शन गरी भाकल पुरा गर्न आउने मानिस बढ्ने र पिकनीक् खान आउने बढ्नै अर्का स्थानीय बासिन्दा नबराज श्रेष्ठ बताउनुहुन्छ ।
यातायातको सुविधा भएको र पवित्र धार्किक स्थल भएकाले पछिल्लो समयमा तराईका जिल्लाका मानिसको रोजाईमा समेत माईस्थान परेको उहाँको भनाई छ । उहाँका अनुसार कमलमाई मन्दिर धार्मिक पर्यटकिय स्थलको रुपमा विकास हुदै गएको छ । उक्त मन्दिरको शुद्ध मनले दर्शन गरेमा मनले चिताएको पुग्ने बिश्वासले भक्तजनहरुको आस्था बढेको हो । कमलामाई देवीको दर्शन गर्न आउने भक्तजनहरुको संख्या बढ्दो रहेको स्थानीय बासिन्दा बताउछन् ।
कमलामाई मन्दिर सुधार तथा व्यवस्थापन समितिका उपाध्यक्ष कृष्णकुमार श्रेष्ठ मेलाका दिन बाहेक अन्य दिनमा पनि सयौंको सङ्ख्यामा भक्तजनहरु मन्दिरमा आई दर्शन गरि आफ्नो भाकल पुरा गरेर फर्किने गरेका बताउनुहुन्छ । उहाँले भन्नुभयो, ‘सिन्धुली राष्ट्रिय बाणिज्य बैङ्क सिन्धुलीमा उक्त मन्दिरको नाममा रहेको २५सय बर्ष पुरानो बहुमूल्य धातुको ‘मण्डमाला’ गहना सङ्क्रान्तिको अघिल्यै दिन साँझमा कमलामाई देवीलाई लगाई दिएपछि उक्त मेला विधिवत सुरु भएको मानिन्छ ।’ उक्त गहना मेला सकिएपछि पुनः ल्याएर सुरक्षीत राखिने स्थानीय बासिन्दा बताउछन् ।
स्थानीय बासिन्दाका अनुसार कमलामाई मन्दिर उत्पतिका सम्बन्धमा एउटा छुट्टै किंबदन्ति रहेको बताउनुहुन्छ । किंवदन्ति अनुसार स्थानीय मगरजातको परिवारमा कमला नाम गरेकी एउटी कन्या थिइन् । एक दिन बिहानै झिसमिसेमा उनी घैटोमा पानी बोकेर घरतर्फ जाँदै गर्दा घैंटो फुटेर पानी पोखियो र उनी त्यही अलप भईन् । त्यही पोखिएको पानी बगेर कमला नदीको उत्पति भयो र कमला नदीको नामबाट कमलामाई मन्दिरको उत्पति भएको बताईएको छ ।
अहिले पनि कमला नदीमो मूहान एउटा माटाको फुटेको घैटो जस्तै रहेको कमलामाई मन्दिर सुधार तथा व्यवस्थापन समितिका उपाध्यक्ष कृष्णकुमार श्रेष्ठ बताउनुहुन्छ । कमलामाई मन्दिर र सदरमुकाम सिन्धुलीमाढीमा रहेका कालीमाई मन्दिर दिदीबहिनी हुन् । त्यसैले पहिले दिदी कालीमाई मन्दिरमा परेवा बली चढाई पूजा गरेपछि मात्रै बहिनी कमालामाई मन्दिरमा आई बलि दिने र पूजाआजा गर्ने परम्परा रहेको छ ।
