ईटहरी, लकडाउनको समय सदुपयोग गर्दै नेपाल पुलिस क्लबका डिफेन्डर प्रवेश कुंवर दनुवार, रास्ट्रिय जागृति क्लब इटहरीका स्थानिय खेलाडी अनिस चौधरी, अभिसेक कालिकोटे र सुनसरी जिल्ला फुटबल तथा रास्ट्रिय जागृति क्लबका कोच , श्याम मानन्धरहरु मिलेर इटहरी १७ का ३० जना १७ बर्ष भन्दा मुनिका बालबालिकाहरुलाई फुटबल प्रशिक्षण गराई रहेका छन् ।
पछिल्लो समयमा युवाहरुमा नै कुलतमा तथा दुर्व्यसनमा बढी संलग्न भएको तर्फ मध्यनजर गर्दै यस विषम परिस्थितिमा यस्ता लतबाट टाढा राख्न तथा एक असल खेलाडी उत्पादन गर्नका लागि फुटबल प्रशिक्षण गराईएको नेपाल पुलिस क्लबका डिफेन्डर प्रवेश कुवर दनुवार बताउछन् । दैनिक २ घन्टा प्रशिक्षण गराउदै आएका उनिहरुले प्रशिक्षण गराउन थालेको पनि ४ महिना पूरा भएको बताए ।
सानै उमेर देखि नै खेलाडी बन्ने सपना बोकेका तर पनि प्रशिक्षणको अभावमा घरमै बसेकालाई प्रोत्साहन गरि खेल क्षेत्रमा अगाडि बढाउन मद्दत गर्नका लागि पनि प्रशिक्षण गराईरहेको दनुवार बताउछन् ।
प्रशिक्षणका लागि आउनेहरुलाई राम्रो प्रशिक्षण दिन सके भविष्यमा देशकै असल खेलाडी उत्पादन गर्न सकिने दनुवारले बताए । देशकै लागि राम्रो र असल खेलाडी उत्पादन गर्ने सम्भावना रहेको भएपनी खेलमैदानको अभाव भने प्रमुख समस्या रहेको छ । स्थानिय सरकारले पनि कुनै सहयोग गरेको छैन् । यसरी फुटबल ग्राउन्ड बिनै अर्काको प्लटिङ्ग्मा प्रशिक्षण गराउदा पनि स्थानीय सरकारको ध्यानाकर्षण नभएको र स्थानीय सरकारसंग पनि खेलमैदानको बिषयमा बेला बेला कुरा उठाउने गरेको भएपनी स्थानीय सरकारले भने यस बिषयमा खासै ध्यानाकर्षण नभएको भन्दै दनुवारले दुःख व्यक्त गरे ।
त्यसैगरी प्रशिक्षणको लागि आउने बालबालिकाहरु भन्छन् –सानै उमेर देखि फुटबल खेलाडी बन्ने सपना छ, फुटबलमा राम्रो ठाउँ छ, भविष्यमा देशका लागि खेल्ने सपना बोकि फुटबल सिकिरहेका छौँ ।’
दनुवारको यस कदमलाई स्थानीय बूढो बाघ फुटबल क्लब साथै देश बिदेशबाट पनि विभिन्न खेल सामाग्री सहयोग हुँदै आएको छ । खेल सामाग्री, प्रशिक्षण गर्नका लागि प्रशिक्षक र खेलाडीहरु रहे पनि खेल मैदान नहुदा समस्या हुने गरेको छ । स्थानीय सरकारले सरकारी जग्गालाई खेल मैदानको लागि उपलब्ध गराई दिए आफ्नो समस्या समाधान हुने दनुवार बताउछन् ।
