माेरङ/नेपाली पत्रकारिताको आधारशिला र दक्ष जनशक्ति उत्पादनको जेठो थलो नेपाल प्रेस इन्स्टिच्युट (NPI) ले एक अनुभवी र दूरदर्शी सारथि पाएको छ। आइतबार सम्पन्न इन्स्टिच्युटको २० औँ साधारण सभाले वरिष्ठ पत्रकार, लेखक एवम् मानव अधिकारकर्मी कपिल काफ्लेलाई सर्वसम्मत रूपमा अध्यक्ष चयन गरेको छ।
नेपालका सञ्चार उद्याेगलाइ सेवा प्रदान गर्ने पहिलाे व्यावसायिक संस्थाकाे रूपमा परिचित भएर चार दशकदेखि क्रियाशील नेपाल प्रेस इन्स्टिच्युटलाई आधुनिक युगको ‘सेन्टर अफ एक्सीलेन्स’ बनाउने सुनौलो प्रस्थानविन्दुमा नयाँ समिति बनेकाे पाइन्छ ।
कपिल काफ्ले: एनपीआईको उत्पादनदेखि नेतृत्वसम्मको यात्रा
नवनियुक्त अध्यक्ष कपिल काफ्ले स्वयम् एनपीआईकै विशिष्ट उत्पादन हुनुहुन्छ। सन् १९८६ मा यही संस्थाबाट १० महिने पत्रकारिता कोर्स पूरा गरी व्यावसायिक यात्रा सुरु गर्नुभएका काफ्ले आज यसैको नेतृत्वमा पुग्नु एक सुखद र प्रेरणादायी संयोग हो । अध्यक्ष काफ्लेसँग नेपाली सञ्चार क्षेत्रको अनुभव यस्ताे छ :
सम्पादकीय नेतृत्व: ‘नेपाल समाचारपत्र’ र ‘राजधानी’ दैनिक जस्ता राष्ट्रिय ब्रोडसिट पत्रिकाको संस्थापक सम्पादक तथा सम्पादकका रूपमा सफल कार्यकाल।
बौद्धिक व्यक्तित्व: ‘बाघ–पाश’ (मिडियाकर्मीको कथामा आधारित) र ‘सुसमचण्डिका’ जस्ता चर्चित उपन्यासका सर्जक।
अधिकारकर्मी: हाल ‘इह्रिकन’ (IHRICON) को कार्यकारी निर्देशक र दक्षिण एसियाली सञ्जाल ‘मेन इन्गेज एलायन्स’ को संयोजकका रूपमा मानव अधिकार र लैंगिक समानताका लागि क्रियाशील।
“हाम्रो लक्ष्य: पत्रकारिताको आगामी उज्यालो बाटो” – अध्यक्ष काफ्ले
पदभार ग्रहण गर्दै अध्यक्ष काफ्लेले एनपीआईको इतिहासप्रति गौरवस्वरूप भविष्यको स्पष्ट मार्गचित्र प्रस्तुत गर्नुभयो । उहाँले भन्नुभयाे- “प्रेस इन्स्टिच्युटले हिजो पनि देशभरका अब्बल र नेतृत्वदायी पत्रकारहरू उत्पादन गरेर आफ्नो सामर्थ्य प्रमाणित गरिसकेको छ। अहिलेको आवश्यकता यसको गौरवमय इतिहासलाई आधुनिक प्रविधि र थप व्यावसायिक निष्ठासँग जोड्नु हो ।”
नयाँ कार्यसमिति : अनुभव र एकताको प्रतीक
काफ्लेको नेतृत्वमा चयन भएको कार्यसमितिमा अनुभवी पत्रकार र विषयविज्ञहरूको बलियो टिम छ :
पदाधिकारीहरू: उपाध्यक्षमा नीता सापकोटा, महासचिवमा श्रीमन शर्मा (विज्ञान) र कोषाध्यक्षमा अमिका राजथला ।
सदस्यहरू: तपनाथ शुक्ला, मन्टेश्वरी राजभण्डारी, पुष्कर माथेमा, गंगादेवी गुरुङ, वसन्त रुपाखेती, अरुण पौडेल र मोहन नेपाली ।
विशेष सल्लाहकारमा : निवर्तमान अध्यक्ष तीर्थ कोइराला र निवर्तमान महासचिव लक्ष्मण उप्रेतीलाई मनोनित सदस्यको रूपमा समावेश गरी संस्थाको निरन्तरता र एकतालाई थप मजबुत बनाइएको छ।
एनपीआई: नेपाली मिडियाको ‘पावरहाउस’
विगत ४० वर्षभन्दा लामो समयदेखि एनपीआईले नेपाली मिडियालाई व्यावसायिक बनाउन खेलेको भूमिका अतुलनीय छ :
दक्ष जनशक्ति : यसका तालिम प्राप्त पत्रकारहरू आज देशका प्रमुख मिडिया हाउसहरूमा नेतृत्वदायी भूमिकामा छन् ।
समावेशी सञ्चार : लैङ्गिक समानता, मानव अधिकार, द्वन्द्व व्यवस्थापन र सुशासनका मुद्दालाई पत्रकारितासँग जोड्न यसले अगुवाइ गर्दै आएको छ।
विकेन्द्रीकरण: विराटनगर र नेपालगञ्जका क्षेत्रीय केन्द्रहरूमार्फत मोफसलको पत्रकारितालाई समेत राजधानीकै स्तरमा पुर्याउन संस्था सफल छ।
पत्रकार तथा सञ्चारकर्मीकाे क्षमता अभिवृद्धि गर्न वरिष्ठ पत्रकार गाेकुल पाेखरेलले २०४१ सालमा याे संस्थाकाे स्थापना गर्नुभएकाे हाे । याे संस्था तालिम तथा अनुसन्धान संस्थाकाे रूपमा शिक्षा मन्त्रालयमा पनि दर्ता भएकाे बुझिएकाे छ ।
