नेपाली कांग्रेसका सभापति गगनकुमार थापाले राष्ट्रिय शक्तिको जिम्मेवारी नेपाली कांग्रेसले नै वहन गर्ने स्पष्ट पारेका छन्। नेपाली कांग्रेस कास्कीले आयोजना गरेको कार्यक्रमलाई सम्बोधन गर्दै सभापति थापाले देशलाई स्थायित्व, लोकतन्त्रको संरक्षण र समावेशी विकासको दिशामा अघि बढाउन कांग्रेस सक्षम र प्रतिबद्ध रहेको बताएका हुन्।
सभापति थापाले मुलुकको वर्तमान राजनीतिक अवस्था चुनौतीपूर्ण रहेको उल्लेख गर्दै यस्ता परिस्थितिमा कांग्रेस केवल सत्ताको खेलमा सीमित नहुने बताए। “कांग्रेस कहिल्यै पनि सत्ता वा प्रतिपक्षको अंकगणितमा मात्र सीमित भएन,” उनले भने, “देश संकटमा पर्दा राष्ट्रिय जिम्मेवारी वहन गर्ने शक्ति कांग्रेस नै हो।”
उनले संविधानको रक्षा, संघीय लोकतान्त्रिक गणतन्त्रको सुदृढीकरण र जनताको भरोसा कायम राख्न कांग्रेसले ऐतिहासिक भूमिका निर्वाह गर्दै आएको दाबी गरे। कांग्रेसकै नेतृत्वमा लोकतन्त्र स्थापना र पुनःस्थापनाका आन्दोलन सफल भएको स्मरण गराउँदै उनले अहिले पनि पार्टीले लोकतान्त्रिक मूल्य–मान्यता जोगाउने दायित्व बिर्सिन नसक्ने बताए।
सभापति थापाले पार्टी संगठन सुदृढीकरणलाई कांग्रेसको प्रमुख प्राथमिकतामा राखिएको जानकारी दिँदै युवाहरूको सक्रिय सहभागिता बिना पार्टी बलियो नहुने धारणा व्यक्त गरे। “अबको कांग्रेस युवामैत्री, जनमैत्री र परिणाममुखी हुनुपर्छ,” उनले भने, “जनताको दैनिक समस्या समाधानमा केन्द्रित राजनीति नै हाम्रो लक्ष्य हो।”
उनले जनजीविका, रोजगारी, शिक्षा, स्वास्थ्य र सुशासनजस्ता विषयमा कांग्रेस स्पष्ट योजना सहित अघि बढिरहेको पनि उल्लेख गरे। देशमा निराशा फैलिन नदिन र जनतामा आशा जगाउन कांग्रेसले जिम्मेवार र परिपक्व भूमिका खेल्ने उनको भनाइ थियो।
कार्यक्रममा नेपाली कांग्रेस कास्कीका नेता, कार्यकर्ता तथा शुभेच्छुकहरूको उल्लेख्य उपस्थिति रहेको थियो। सहभागीहरूले सभापति थापाको धारणा सुन्दै पार्टीलाई अझ सशक्त र जनमुखी बनाउँदै लैजाने प्रतिबद्धता व्यक्त गरेका थिए।
