पथरी/ उत्साही साना किसान कृषि सहकारी संस्था, पथरीशनिश्चरे–२ (मोरङ) को आयोजनामा आधारभूत तह (कक्षा ५ र ६) स्तरीय ‘भुवनेश्वर+अम्बिकादेवी हस्तलेखन प्रतियोगिता २०८२’ अन्तर्गत शुक्रबार लेखन चरणकाे कार्यक्रम सम्पन्न भएको छ।
पथरीशनिश्चरे नगरपालिकाका विभिन्न चारवटा केन्द्रहरूमा एकैसाथ यो प्रतियोगिता सञ्चालन गरिएको थियो।
प्रतियोगिताका मुख्य विवरणहरू
आयोजक: उत्साही साना किसान कृषि सहकारी संस्था लि., पथरीशनिश्चरे–२।
सहभागी संख्या: सामुदायिक र संस्थागत (निजी) विद्यालयका गरी कुल १ सय ४१ जना विद्यार्थी।
परीक्षा केन्द्रहरू: पञ्चायत मावि, अमरसिंह मावि, बुद्ध मावि र सिंहवाहिनी मावि।
छनौट प्रक्रिया: छात्र र छात्राको छुट्टाछुट्टै समूह तथा सामुदायिक र संस्थागत विद्यालयका प्रतिस्पर्धीहरूको अलग-अलग ।
पुरस्कार वितरण र दिगोपन
प्रतियोगिताका सहजकर्ता महेन्द्र ढुंगानाका अनुसार प्रथम, द्वितीय, तृतीय र सान्त्वना स्थान हासिल गर्ने कुल ३२ जना उत्कृष्ट विद्यार्थीहरूलाई पुरस्कृत गरिनेछ। पुरस्कार वितरणका लागि पर्सि सोमबार पञ्चायत माविको केन्द्रमा एक विशेष समारोह आयोजना गरिने संस्थाले जानकारी दिएको छ।
उत्साही साना किसान कृषि सहकारी संस्थाले ‘भुवनेश्वर+अम्बिकादेवी हस्तलेखन प्रवर्धन कोष’ मार्फत विगतका वर्षहरूदेखि नै विद्यार्थीहरूको लेखन सिप विकासका लागि निरन्तर यस्ता प्रतियोगिताहरू आयोजना गर्दै आएको छ।
