इलामको माङसेबुङमा किरात धर्मगुरु मुहिङगुम अङसीमाङ लिङदेन आत्मानन्द सेइङज्यूको ७२औं जन्मोत्सवको अवसरमा आयोजित अन्तर्राष्ट्रिय पुरुष फुटबल प्रतियोगिता ‘आत्मानन्द कप–२०८२’ आगामी मंसिर ७ गतेदेखि १७ गतेसम्म सञ्चालन हुने भएको छ।
संयोजक मनप्रसाद आङबुहाङले पत्रकार सम्मेलनमार्फत प्रतियोगितामा नेपाल र भारतका ८ प्रतिष्ठित फुटबल क्लब सहभागी हुने जानकारी दिएका छन्। सहभागी टिमहरूमा नेपालका दमक भाङबारी स्पोर्टिङ युथ क्लब, दुधे युथ क्लब, सिरिजंगा स्पोर्टिङ क्लब पथरी मोरङ्ग , लेटाङ फुटबल क्लब, तिजोक युवा क्लब, माङसेबुङ गाउँपालिका, युथ अफ माङसेबुङ र भारतको कञ्चनजंघा फुटबल क्लब सिलगुडी रहेका छन्।
विजेता टिमले नगद रु. ३ लाख ११ हजार १७२ र उपविजेताले रु. २ लाख ११ हजार १७२ सहित ट्रफी र मेडल पाउनेछन्। उत्कृष्ट खेलाडी, गोलकिपर, डिफेन्स, फरवार्ड, कोच र उदयमान खेलाडीले जनही रु. ८१७२ पाउनेछन् भने म्यान अफ द म्याचलाई रु. ५१७२ प्रदान गरिनेछ।
किरात धर्मगुरुको जन्मोत्सवको अवसरमा फुटबलसँगै म्याराथन, छेलो, धनुबाँड र हाँडी फुटाउने जस्ता खेलहरू पनि आयोजना हुनेछन्। आत्मानन्द कप प्रदेश १ को प्रतिष्ठित वार्षिक फुटबल प्रतियोगिता हो। गत वर्षको उपाधि दुधे युथ क्लब झापाले जितेको थियो।
