पथरी शनिश्चरे, मोरङ — सरकारले ल्याएको शिक्षा विधेयक २०८० को विरोधमा आज देशभरका निजी तथा आवासीय विद्यालयहरूले आन्दोलन गरेका छन्। निजी तथा आवासीय विद्यालय अर्गनाइजेसन (प्याब्सन) र नेसनल प्याब्सनको आह्वानमा विद्यालय सञ्चालकहरूले विधेयकले निजी शिक्षा क्षेत्रलाई धरापमा पार्ने भन्दै विरोध जनाएका छन्।
भिडियो
https://https://www.facebook.com/share/v/16dMLLF5gb/?mibextid=wwXIfr
यसै क्रममा, मोरङको पथरी शनिश्चरेमा पनि निजी विद्यालयका बसहरूमा कालो झन्डा राखेर नगर परिक्रमा गरिएको छ। विधेयकमा रहेका कतिपय प्रावधानहरूले निजी लगानी निरुत्साहित गर्ने र निजी विद्यालय सञ्चालन गर्न कठिन हुने उनीहरूको भनाइ छ।
प्रमुख माग र असन्तुष्टि
निजी विद्यालय सञ्चालकहरूले शिक्षा विधेयकमाथि विभिन्न बुँदाहरूमा गम्भीर असन्तुष्टि व्यक्त गरेका छन्। उनीहरूका मुख्य मागहरू निम्नानुसार छन्:
- निजी विद्यालयलाई गैर-नाफामूलक बनाउने प्रावधान खारेज गर्नुपर्ने: विधेयकले निजी विद्यालयलाई सार्वजनिक गुठीमा परिणत गर्नुपर्ने प्रस्ताव गरेको छ, जसले लगानी र सञ्चालनमा चुनौती थप्ने उनीहरूको भनाइ छ।
- शतप्रतिशत छात्रवृत्तिको प्रावधान खारेज गर्नुपर्ने: विधेयकले निजी विद्यालयहरूले विद्यार्थी भर्ना गर्दा शतप्रतिशत छात्रवृत्ति दिनुपर्ने प्रावधान राखेको छ, जसले विद्यालयहरूलाई आर्थिक भार पर्ने र सञ्चालन गर्न नसकिने अवस्था आउने उनीहरूले बताएका छन्।
- स्वायत्तताको सुनिश्चितता: सरकारले शैक्षिक गुणस्तरको नाममा निजी विद्यालयको आन्तरिक व्यवस्थापनमा हस्तक्षेप गर्न खोजेको आरोप पनि उनीहरूले लगाएका छन्।
प्याब्सन पथरी शनिश्चरेका अध्यक्ष सन्तोष बस्नेतले सरकारले निजी शिक्षा क्षेत्रमाथि विभिन्न बहानामा नियन्त्रण गर्न खोजेको आरोप लगाउनुभयो। उहाँले आफ्ना माग पूरा नभए देशभरका निजी विद्यालयहरू अनिश्चितकालीन बन्दसम्मका कडा आन्दोलनमा जान बाध्य हुने चेतावनी पनि दिनुभयो।
आजको यो प्रदर्शनले देशभर शिक्षा क्षेत्रमा ठूलो हलचल ल्याएको छ। यस विषयमा सरकार र शिक्षा मन्त्रालयले हालसम्म कुनै ठोस प्रतिक्रिया दिएका छैनन्, जसले गर्दा निजी विद्यालय सञ्चालकहरू थप आक्रोशित भएका छन्।
