विराटनगर, मोरङको ग्रामथान गाउँपालिकाका अध्यक्ष नमोनारायण माझीले उपाध्यक्ष हुँदाहुँदै वडाध्यक्षलाई कार्यवाहक अध्यक्षको जिम्मेवारी दिएका छन् । ९ दिने चीन भ्रमणमा जाने भएपछि उनले कार्यवाहक अध्यक्षको जिम्मेवारी वडाध्यक्षलाई दिएका हुन् ।
माझीले वडा नम्बर ३ का अध्यक्ष रमेशकुमार भगतलाई कार्यवाहक अध्यक्षको जिम्मेवारी दिएका हुन् । भगत नेकपा माओवादी केन्द्रबाट निर्वाचित वडाध्यक्ष हुन् । पालिका उपाध्यक्ष गुणवतीदेवी थारुले आफू कार्यालयमा हुँदाहुँदै वडाध्यक्षलाई कार्यवाहक जिम्मेवारी दिएको गुनासाे गरिन् । उनले कार्यवाहककाे विषयमा अब न्यायिक लडाइँ लड्ने बताइन् ।
माझी नेकपा माओवादी केन्द्रका नेता दिननाथ शर्माको नेतृत्वमा मंगलबारदेखि ९ दिने चीन भ्रमणमा जाँदैछन् । सोमबार कार्यालयबाट बिदा भएका उनको बिदाइका लागि उपाध्यक्ष थारु गइनन् ।अध्यक्ष माझी नेकपा माओवादी केन्द्र उपाध्यक्ष थारु एमालेबाट निर्वाचित भएकी हुन् । दुईबीच सम्बन्ध राम्रो छैन । सम्बन्ध राम्रो नभएपछि अध्यक्ष माझीले आफ्नै पार्टीका वडाध्यक्षलाई कार्यवाहककाे जिम्मेवारी दिएका हुन् । वडाध्यक्ष भगतले कार्यवहाक जिम्मेवारी आफूले पाएकाे बताए । कानुनत: उपाध्यक्ष हुँदाहुँदै वडाध्यक्षलाई कार्यवाहक जिम्मेवारी दिन मिल्दैन ।
