उर्लाबारी, मंगलबार बिहान सप्तरीमा एक ट्रक दुर्घटना हुँदा उर्लाबारीका युवा सविन राईको मृत्यु भएको छ ।
पूर्व-पश्चिम राजमार्गअन्तर्गत सप्तरीको शम्भुनाथ नगरपालिका -५ मा बिहान पश्चिमबाट पूर्वतर्फ आउंदै गरेको मधेश प्रदेश -०३-००१ ख ८१८१ नम्बरको क्लिंकर लोड गरेको १२ चक्के ट्रक दुर्घटना हुँदा उर्लाबारी वडा नम्बर १ बगर गाउँका २५ वर्षिय राईको मृत्यु भएको सप्तरी प्रहरीले जनाएको छ ।
प्रहरीकाअनुसार उक्त ट्रक मोहनपुर पुलबाट १५/२० मिटर तल खसेर दुर्घटना हुँदा चालक राईको मृत्यु भएको जनाईएको छ । ट्रकभित्र नै चेपिन गई चालक राईको घटनास्थलमा नै मृत्यु भएको प्रहरीले जनाएको छ ।
यता राईको मृत्युपछि बगर गाउं शोकमा परेको छ । उनी मंगलबारे फुटबल क्लवका अध्यक्ष तथा पूर्व खेलाडी पपिन राईका भाई हुन् ।
परिवारस्रोत अनुसार राईको पार्थीव शरिरलाई किराँत संस्कार अनुसार बुधबार बिहान १० बजे उर्लाबारी वडा नम्बर १ कान्छी चोकस्थित चिहान डाँडामा अन्तिम संस्कार गरिने बताईएको छ ।
