उदयपुर, छुरी देखाएर कारमा सवार व्याक्तिलाई लुट्न खोज्ने चारजना पक्राउ परेका छन् ।
उदयपुरको चौदण्डीगढी नगरपालिका १० खैराहझोडास्थित सडकमा कार रोकेर यात्रुहरुलाई लुट्न खोज्नेहरु पक्राउ परेका हुन् । लुटेराहरुले असोज ३ गते दिनको ३ बजेतिर सडकमा ढुङ्गा राखेर अवरोध गरेका थिए । सडक अबरोध भएपछि रोकिएको कारमा सवार मानिसलाई लुटेराहरुले घरेलु हतियार छुरी देखाएर एक लाख पचास हजार मागेका थिए ।
घटनाबारे जानकारी आएसँगै जिप्रका उदयपुरबाट इन्स्पेक्टरसहितको टोली र इलाका प्रहरी कार्यालय बेल्टारबाट खटिएको संयुक्त टोलीलो चौदण्डीगढी १० का नारद बिश्वकर्मा र अर्जुन पण्डितलाई घटना स्थलबाट पक्राउ गरेको थियो । पक्राउ परेकाहरुको सूचनाका आधारमा खोजिगर्दा सोही वडाका सेफकान्त चौधरी र भोटे भनिने सन्तोष दनुवार हतियार सहित पक्राउ परेका हुन् ।
उनीहरुलाई अभद्र व्यवहार मुद्धा चलाइएको छ । चारै जनालाई थप अनुसन्धानका लागि जिल्ला प्रशासन कार्यालयबाट १० दिनको म्याद थप गरिएको उदयपुर प्रहरीले जनाएको छ ।
