(रासस)
यसवर्षको सिएम कन्दङ्वा राष्ट्रिय प्रतिभा सम्मान २०७९ प्राध्यापक डाक्टर गोबिन्दराज भट्टराईलाई दिइने भएको छ ।
नेपाल प्रज्ञा प्रतिष्ठानका कुलपति भूपाल राईको प्रमुख आतिथ्यमा सो सम्मान प्रदान गर्ने तयारी रहेको कोष संरक्षक रविन कन्दङ्वाले जानकारी दिनुभयो । चैत २९ गते मोरङ पथरीमा औपचारिक कार्यक्रमको आयोजना गरि रु. एक लाख एक हजार बराबर रकमको सो सम्मान प्रा.डा. भट्टराईलाई प्रदान गरिने भएको हो ।
यससंगै रु. ५१ हजार राशीको सिएम कन्दङ्वा युवा राष्ट्रिय प्रतिभा सम्मान २०७९ संगीत क्षेत्रमा योगदान पु¥याउदै आउनुभएका अनिल फागोलाई प्रदान गरिने भएको छ ।
यसवर्षबाट थप गरिएको रु. ११ हजार रुपैँया राशीको सुशिला कन्दङ्वा पत्रकारिता राष्ट्रिय सम्मान २०७९ बाट स्थानीय पत्रकार अर्जुन जम्नेली राईलाई सम्मान गर्ने तयारी रहेको संरक्षक कन्दङ्वाले जानकारी दिनुभयो ।
सिएम (चन्द्रमान) कन्दङ्वा लामो समयसम्म शिक्षण पेशामा आबद्ध रहनुभएको थियो । शिक्षण पेसामा रहेकै बेलादेखि नै मार्क्सवादी राजनीतिमा होमिनुभएको थियो । पूर्वी नेपालमा संस्थागत विद्यालय स्थापना गर्नेदेखि सहित्यमा कलम चलाउनेसम्मका काम कन्दङ्वाले गर्नुभएको थियो ।
वि.सं. १९८१ मा दार्जिलिङमा जन्मिनुभएका कन्दङ्वाका ३ वटा उपन्यास र २ वटा कथासंग्रह समेत प्रकासित रहेका छन् । कन्दङ्वा ६ वटा भाषाका ज्ञाता समेत रहनुभएको थियो । कन्दङ्वाको वि.सं. २०६२ फागुन २५ गते निधन भएको हो ।
