काठमाडौँ, नेपालीलाई भुटानी शरणार्थी बनाएर अमेरिका पठाई दिने भन्दै ठगी गरेको आरोपमा केशव दुलाल पक्राउ परेका छन् । दुलाललाई काठमाडौं उपत्यका अपराध अनुसन्धान कार्यालयको टोलीले पक्राउ गरेको हो ।
मोरङ पथरीशनिश्चरे १० का दुलालले मोरङको शनिश्चरे सिविर र झापाको बेलडाँगी सिविरका शरणार्थीको नाममा आवश्यक कागजात बनाएर अमेरिका पठाइदिने भन्दै करोडौँ असुलेको हो । गिरोहले जनही १० देखि ४० लाखसम्म असुलेको प्रहरीको प्रारम्भिक अनुसन्धानमा खुलेको छ ।
दुलाल यस मुद्दाका मुख्य नाइके मानिएको छ । दुलाल सहितको गिरोहलाई पक्राउ गर्न ८१ जनाले प्रहरीमा उजुरी दिएका थिए । सोही उजुरीका आधारमा केशव दुलाल, सानु भण्डारी र टेक गुरुङ आइतबार साँझ पक्राउ परेका हुन् । गिरोहमा सहभागी अन्य खोजी भइरहेको उपत्यका अपराध अनुसन्धान कार्यालयका प्रमुख एसएसपी मनोज केसीले जानकारी दिए ।
पक्राउ परेका दुलाल सुजाता कोइराला परराष्ट्र मन्त्री हुदा स्वकीय सचिव थिए । सोही राजनीतिक आडमा दुलालले गिरोह चलाइरहेको भन्दै यसअघि पनि पक्राउ परेका थिए तर आवश्यक प्रमाण नभएको भन्दै तत्कालिन गृहमन्त्री बालकृष्ण खाँडको दवावमा दुलाल छुटेका हुन् । यसरी हेर्दा दुलाल मात्रै नभएर यो गिरोह चलाउने ठुलै राजनीतिक व्यक्ति रहेको बुझिन्छ ।