लामिछानेकाे प्रतिवद्धता : विकास निर्माण र जनताको सेवा पहिलाे प्राथमिकता

लामिछानेकाे प्रतिवद्धता : विकास निर्माण र जनताको सेवा पहिलाे प्राथमिकता

आगामी मंसिर ४ गते हुने प्रदेश सभा निर्वाचनमा ५ दलीय गठबन्धनको तर्फबाट कास्की क्षेत्र नम्बर २ (१) का उम्मेदवार विश्वप्रकाश लामिछानेले अब आफुले यस क्षेत्रका जनताको सेवा गर्ने जिम्मेवारी आएको बताएका छन् ।

जीवनका ४० वर्ष समाजसेवामै बिताएको प्रसंग निकाल्दै लामिछानेले निर्वाचनमा जित वा हार जे भएपनि अब यस क्षेत्रको विकास र यस क्षेत्रका जनताको सेवा गर्ने जिम्मेवारी आफ्नो काँधमा आएको बताए । कास्की २ (१) अन्तरगत पर्ने पोखरा महानगरपालिका ३३ को देउराली हुडिकोट, पौवाटोल, आपु भन्ज्याङ्ग लगायतका स्थानमा निर्वाचन अभियान सञ्चालनका क्रममा लामिछानेले यस्तो प्रतिवद्धता व्यक्त गरेका हुन् ।

लामिछानेले आफ्ना योजना भनेका आफ्ना मात्रै नभई ५ दलका भएको जिकीर गरे । यस क्षेत्रमा स्वास्थ्य शिक्षा लगायतको क्षेत्रमा समस्या रहेको बताउँदै उनले स्वास्थ्य र शिक्षामा सुधार गर्दै यस क्षेत्रलाई पर्यटकीय केन्द्रको रुपमा विकास गर्ने प्रतिवद्धता समेत व्यक्त गरे । पोखरा ३३ भनेर यस क्षेत्र मिसाएपनि यहाँका जनताले महानगरको अनुभव गर्न नपाएको भन्दै उनले अब काम गर्दा पोखराको ग्रामीण क्षेत्रको विकास गर्न पहल गर्ने वचन दिए ।

नेपाली काँग्रेसका केन्द्रीय सदस्य गुरु बरालले चुनावमा हारजित भन्दा मतदाताको मन जित्नु ठुलो कुरा भएको बताए । गठबन्धनका उम्मेदवारले जित्ने वातावरण भएको उनको भनाई थियो । जनप्रतिनिधि जनताको सुख दुखमा साथमा हुनुपर्छ भन्दै बरालले संविधानको रक्षाको लागि गठबन्धन भएको स्पष्ट पारे । उनले गठबन्धनका उम्मेदवार हारे संबिधान नै जोखिममा पर्न सक्ने बताए ।

नेपाल समाजवादी पार्टी गण्डकी प्रदेश अध्यक्ष हेम बहादुर थापाले हरेक ५ वर्षमा नयाँ नेता छान्ने अवसर आएको भन्दै अबको पाँच वर्ष दुःख पाउने की सुख पाउने भन्ने निर्णय गर्ने समय आएको बताए ।

नेपालमा हाल २ वटा गठबन्धन भएको भन्दै थापाले सत्ता पक्षीय गठबन्धन भनेको गरिव दुखीलाई पनि समेटेर लैजाने शक्ति भएको बताए । थापाले पटक पटक संसद बिघटन गर्ने तथा संविधान मास्ने प्रतिगामी शक्तिको विरुद्ध गठबन्धन भएको स्मरण गराए । लोकतन्त्रको रक्षा, राजनीति स्थिरताको लागि गठबन्धन भएको भन्दै उनले व्यवस्था परिवर्तन भयो अवस्था परिवर्तनको लागि गठबन्धन गरिएको बताए । गठबन्धनका उम्मेदवार क्षमता भएका, ईमानदार, काम गर्ने क्षमता भएको उनले बताए ।

कास्की २ (१) का प्रचार प्रसार संयोजक दिनेश आचार्य जनताको समस्या भए गठबन्धनले सहकार्य गर्ने बताए । जनताले चाहेको शिक्षा स्वास्थ्य निशुल्क बनाउन, व्यवसायीले ढुक्क भएर व्यापार व्यवसाय गर्ने वातावरणको निर्माण गर्न गठबन्धनका उम्मेदवारले जित्नुपर्ने बताए ।

स्थानीय गंगा बहादुर गुरुङले महानगर भित्रै रहेपनि ग्रामिण क्षेत्रमा धेरै समस्या रहेको बताउँदै यस क्षेत्रमा सार्वजनिक भवन बनाउन पर्ने माग गरे । उनले गठबन्धन किन भएको सबैलाई थाहा भएको भन्दै उम्मेदवारलाई सफलताको शुभकामना दिए । नेपाली काँग्रेस वडा नम्बर ३३ का सभापति तिलकप्रसाद अधिकारीको अध्यक्षतामा निर्वाचन परिचालन कार्यक्रम सम्पन्न भएको थियो ।

सम्बन्धित खवर