भीमराज अधिकारी, लेटाङ
स्थानीय तह निर्वाचन २०७९ मा सहभागी मोरङका कोहीपनि (प्रमुख, उपप्रमुख) जनप्रतिनिधिले निर्वाचन खर्च विवरण समयमा नबुझाएको पाइएको छ ।
आयोगले समयमा निर्वाचन खर्च नबुझाएको र स्पष्टिकरण माग गर्दा समेत चित्तबुझ्दो स्पष्टिकरण नआएको भन्दै सूचि सार्वजनिक गरेको छ । समयमा खर्च विवरण नबुझाउनेमा मोरङका १७ वटै पालिकाका प्रमुख र उपप्रमुखहरू छन् ।
य
सरी समयमा विवरण नबुझाउनेलाई आयोगले महानगपालिकाका प्रमुख, उपप्रमुखलाई ७ लाख ५० हजार जरिवाना तोकेको छ । उपमहानगरका प्रमुख, उपप्रमुखलाई ५ लाख ५० हजार, नगपालिकाका प्रमुख, उपप्रमुखलाई ४ लाख ५० हजार र गाउँपालिकाका अध्यक्ष, उपाध्यक्षलाई ३ लाख ५० हजार जरिवाना तोकेको छ ।
सूचना प्रकाशन भएको मितिले ६ महिना भित्रमा जरिवाना रकम दाखिला गर्न आयोगले निर्देशन गरेको छ । यदि जरिवाना रकम दाखिला नगरेको खण्डमा ६ वर्षसम्म कुनैपनि तरिकाले निर्वाचनमा उमेद्वार हुन नपाउने र सो रकम सरकारी बाँकी सरहको असुल उपर गर्न केन्द्रिय तहसिल कार्यालयलाई विवरण पठाउने आयोगले जनाएको छ ।
विवरण बुझाउन बाँकी रहेका मोरङका प्रमुख, उपप्रमुखहरू ः
बिराटनगर महानगरपालिका प्रमुख नागेश कोइराला र उपप्रमुख शिल्पा कार्की, उर्लाबारी नगरपालिका प्रमुख गंगाप्रसाद खरेल र उपप्रमुख मिना कुमारी खतिवडा, पथरीशनिश्चरे प्रमुख मोहन प्रसाद तुम्बापो र उपप्रमुख देवीमाया काफ्ले, बेलबारी प्रमुख दिल प्रसाद राई र उपप्रमुख नीतु थापा, रंगेली प्रमुख दिलिप कुमार अग्रवाल र उपप्रमुख भूमा कुमारी पराजुली, रतुवामाई नागेश्वर प्रसाद सिंह गनगाई र उपप्रमुख दमयन्ता देवी चुडाल, लेटाङ नगरपालिका प्रमुख भुपेन्द्र कुमार लावती र उपप्रमुख कृष्ण कुमारी पोख्रेल, सुनवर्षी नगरपालिका प्रमुख श्याम प्रसाद राजवंशी र उपप्रमुख मीरादेवी केवरथ, सुन्दरहरैँचा नगरपालिका प्रमुख केदार प्रसाद गुरागाई र उपप्रमुख अकलि चौधरीले निर्वाचन खर्च विवरण नबुझाएका हुन् ।
गाउँपालिकाहरूमा कटारी गाउँपालिका अध्यक्ष देवराज चौधरी, उपाध्यक्ष सीतादेवी राजवंशी, कोपोखरी राजमति इङ्नाम र भोला प्रसाद अधिकारी, केराबारी सुमन मिरिङचिङ मगर र मनमाया मगर, ग्रामथान जय प्रकाश गच्छदार थारु र गुणवति देवी थारु, जहदा जितेन्द्र प्रसाद शाह र हन्ना सोरेन, धनपालथान जिवछ प्रसाद गच्छदार र नसिमा वानो, बुढिगंगा जित नारायण थापा मगर र अमृता कुमारी गच्छदार, मिक्लाजुङ बविकुमार राई र दिनेश पौडेलले पनि निर्वाचन खर्च नबुझाएको आयोगले जनाएको छ ।