पथरी, देश आर्थिक संकटमा फसेको छ । दिनानुदिन दैनिक उपभोग्य सामग्रीको मुल्य वृद्धि भइरहेको छ तर जनप्रतिनिधिले सपथ ग्रहण गरेर कार्यालय पुग्न नपाउँदै नयाँ कुर्सी, टेबल र सोफासेट खरिद गरेर कार्यालयमा तयार गरिएको छ ।
मोरङको पथरी शनिश्चरे नगरपालिकामा मात्रै १६ लाखको कुर्सी, टेबल र सोफा सेट खरिद गरिएको हो । नगरका १० वटा वडा र नगरमा आरामदायी कुर्सी, टेबल र सोफासेट थिए । मेयर, उपमेयर र वडा कार्यालयका लागि खरिद गरिएका पुराना सोफासेट अहिले पनि नयाँ जतिकै छन् । राम्रोसंग धुलोसम्म लाग्न नपाएका सोफासेट फेर्नुपर्ने आवश्यकता नगरका कर्मचारीलाई की जनप्रतिनिधिलाई लागेको हो पथरी शनिश्चरे ५ का अभिषेक भट्टराईले प्रश्न गरेका छन् ।
वडा कार्यालयहरूमा भएका ती सेफासेट अव व्यवस्थापन गर्ने उचित स्थान छैन् तर अपुग रहेकाले खरिद गरेको नगरका प्रमुख प्रशासकीय अधिकृत लक्ष्मी प्रसाद खरेलले जानकारी दिए । नयाँ कुर्सी, टेबल, टि–टेबल र सोफासेट गरी भ्याट बाहेक १६ लाख ५ हजार ९५० को फर्निचर खरिद भएको खरेलले बताए । नगरले फर्निचर अभाव रहेको देखाएर नयाँ जनप्रतिनिधिले पदभार ग्रहण नगर्दै किन यत्रो खर्च गर्दैछ ? अहिले अभाव छ भन्दै खरिद गरिएपछि अव पुराना फर्निचरले वडा कार्यालयका प्यासेज भरिने देखिएको छ ।
यस विषयमा नवनिर्वाचित मेयर मोहन तुम्वापो आफुले पदभार नै ग्रहण नगरी भएको यो खर्चमा अनविज्ञ रहेको बताए । ‘‘पुरानो जनप्रतिनिधिले गरेकी कर्मचारीले गरे यसरी अनावश्यक खर्च नगरेको भए हुने’’ तुम्वापोले बताए ।