पथरी, मोरङको पथरीशनिश्चरेमा आजबाट शुरु पथरीशनिश्चरे फुटबल प्रिमियर लिगको उद्घाटन खेलमा शिखर फुटबल क्लबले विजयी शुरुवात गर्दै खेल तालिकामा ३ अंक जोडेको छ ।
शिखर फुटबल क्लबले वि एण्ड वि वाईजिएफटि फुटबल क्लबलाई १–० को गोल अन्तरले पराजित गर्दै सो अंक जोडेको हो । शिखर फुटबल क्लबका लागि सौरज राउतले खेलको ४५ औँ मिनेटमा गरेको गोल नै जितका लागि पर्याप्त बनेको हो । वाईजिएफटिले गोल गर्ने केहि अवसरहरु प्राप्त गरेपनि गोल गर्न बाट चुकेपछि अंकविहिन बन्न वाध्य भयो । आजको खेलको मेन अफ द म्याच विजेता टिमका सौरज राउत घोषित हुदैँ नगद ३ हजार रुपैयाँ प्राप्त गरे ।
लिगको दोस्रो चरणको खेलमा शिखर फुटबल क्लबले वाइएफसिसँग खेल्नेछ भने वाईजिएफटिले टेन नवोदयसँग प्रतिस्पर्धा गर्नेछ । प्रतियोगिता अन्तर्गत भोलीको खेल टेन नवोदय र वाइएफसिविच हुनेछ । टेन नवोदय यस लिगको डिफेन्डिङ् च्याम्पियन रहेको छ ।
लिगको समुह ए मा वाइजिएफटि, शिखर फुटबल क्लब, टेन नवोदय र वाइएफसि रहेका छन् भने समुह बि मा देविगञ्ज फुटबल क्लब, न्यू स्टार फुटबल क्लब, द रियल ब्रदर फुटबल क्लब र सिरिजङ्गा फुटबल क्लब रहेका छन् । प्रतियोगीताका सम्पूर्ण सहभागी टिमहरुमा अक्सनमार्फत खेलाडि अनुबन्धित गरिएको छ । प्रत्येक टिममा १/१ मार्कि खेलाडि सहित अक्सनबाट चुनिएका खेलाडि रहेका छन् ।
लिगको विजेता टिमले २ लाख ५१ हजार रुपैयाँ, उपविजेताले १ लाख ५१ हजार रुपैयाँ र ट्रफी प्राप्त गर्नेछन् । यस्तै अन्य विधागततर्फ बेष्ट गोलकिपर, बेष्ट डिफेन्स, बेष्ट मिड फिल्डर, बेष्ट फरवार्ड, हाई स्कोरर्, बेष्ट कोच, राइजिङ प्लेयरले जनहीँ ७ हजार ५ सय रुपैयाँ र ट्रफी प्राप्त गर्नेछन् । यसैगरी प्रतियोगिताको सर्वोत्कृष्ट खेलाडीले नगद १२ हजार ५ सय रुपैयाँ र ट्रफी प्राप्त गर्नेछ ।
यसअघि प्रतियोगीताको औपचारीक उद्घाटन पथरीशनिश्चरे नगरपालिकाका नगर प्रमुख दिलिप कुमार राईले गर्नुभएको थियो । प्रतियोगिताको टाइटल स्पोन्सर इन्ट्रा नेशनल वेलफेयर एण्ड सपोर्ट फाउन्डेसन अफ अमेरिकाले गरेको छ भने प्रतियोगिताको मुख्य सहयोगी पथरीशनिश्चरे नगरपालिका रहेको छ ।
