भीमराज अधिकारी, पथरी
भूमि सम्बन्धी समस्या समाधान गर्नका लागि गठित आगोगको बिघटन गरेको भन्दै ओली पक्षीय एमालेले देशैभर आन्दोलन चर्काइरहेको छ ।
आइतबार मोरङको पथरी बजारमा ११ बजेका लागि राखिएको बिरोधको कार्यक्रममा बल्ल तल्ल हाराहारी १ सयजना मान्छे उपस्थित थिए । करिब १ बजेतिर सुरुभएको बिरोधको कार्यक्रम पथरी बजार परिक्रमा गरेर कोणसभामा परिणत भयो । कोणसभामा वक्ताहरुले भूमि सम्बन्धीका विषयमा भन्दा पनि सरकारको आलोचना गर्दै आक्रोस र कुण्ठा पोखे ।
सभालाई सम्बोधन गर्दै पथरी शनिश्चरे नगर उप प्रमुख यमुना विष्टले केन्द्र सरकारले गरेको निर्देशन आफुहरुले नमान्ने सार्वजनिक उद्घोष गरिन् । आफ्नो पाटिको सरकार हुँदा जनभावना अनुसारका काम गरेको तर अहिलेको जनादेशको सरकारले केही काम गर्न नसक्ने भन्दै त्यस्तो सरकारले गरेको निर्देशन नमान्ने विष्टको भनाइ थियो ।
प्रमुख अतिथिका रुपमा राष्ट्रिय युवासंघ केन्द्रिय कमिटि महासचिव रमेश आचार्यले सम्बोधन गरे । आचार्यले करिब १२ लाख जनताले धनिपूर्जा पाउने अवस्थामा सरकारले तुसारापात गरेको बताए । अबको सरकारले कुनै आयोग बनाएर काम गर्न नसक्ने तर युवासंघ संधै सुकुम्बासीहरुको साथमा रहेको आचार्यको जिकिर थियो ।
कार्यक्रम स्थलमा एमालेको चुनावी गीत घन्किरहयो, सुकुम्बासीका नाउँमा भनेर गरिएको कार्यक्रममा ओली खेमाका एमाले कार्यकर्ता बाहेक कोही देखा परेन्न । ब्यानरमा आयोजकका रुपमा राष्ट्रिय युवासंघ नेपाल, अनेरास्ववियु, अनेम संघ, अनेकिम महासंघ पथरी शनिश्चरे गरी ४ वटा भातृ संगठनहरु थिए । ४ वटा संगठनले आयोजना गर्दा पनि सुकुम्बासीको समस्या बोक्न सकेन्न ।
अरुबेला सुकुम्बासी समस्याका विषयमा हुने कार्यक्रममा पथरीमा हजार बढि मानिसहरु देखा पर्दथे । साझा समस्याका ब्यानर र प्लेकार्डहरु हातमा हुन्थे तर आज पथरीमा देखिएको कार्यक्रममा सुकुम्बासीको समस्या बर्षौँ देखि बोकेर हिड्ने कुनै नेता देखिएन्न । बरु सरकारको बिरुद्धमा लेखएका प्लेकार्ड र भातृ संगठनका ब्यानरहरु देखा परे पछि पथरी शनिश्चरेवासी आश्चर्यमा परेका छन् ।
