भारतीय सीमा सुरक्षा बल (एसएसबी) ले महाकाली नदीमा रहेको तुइनको डोरी काट्दा दार्चुलाको ब्यास गाउँपालिका – २ का जयसिंह धामी बेपत्ता भएको घटनाको नेपाल कम्युनिष्ट पार्टीले विरोध गरेको छ ।
शनिबार काठमाडौँमा विरोध प्रदर्शन गर्दै सो पार्टीले सीमाक्षेत्रका जनताको सुरक्षाको ग्यारेन्टी गर्न माग गरेको छ । प्रदर्शनमा सहभागी भएकाहरुले भारतीय साम्राज्यवाद मुर्दावाद, सीमामा भारतीय ज्यादती बन्द गर, लिपुलेक कालापानी हाम्रो हो, नेपाल र नेपालीमाथिको हत्या हिंसा बन्द गर लगायतका नारा लगाएका थिए ।
धामी महाकाली तर्ने क्रममा भारतीय एसएसबीले तुइन काटी दिँदा महाकाली नदीमा बगेर बेपत्ता भएका थिए । एसएसबीको उक्त कार्यको नेपालमा विरोध भइरहेको छ ।
यस्तै, अखिल नेपाल किसान महासंघ, अखिल नेपाल किसान महासंघ (क्रान्तिकारी), अखिल नेपाल किसान युनियन र अखिल नेपाल प्रगतिशील किसान संघले आज संयुक्त रुपमा विज्ञप्ति जारी गरी उक्त घटनाका बारेमा यथार्थ विवरण सार्वजनिक गर्न माग गरेका छन् ।
शुक्रबार महाकाली नदी तर्ने क्रममा व्यास गाउँपालिका–२ का धामी नदीमा बगेका थिए । तुइनमा महाकाली तरिरहेको बेला भारतीय सशस्त्र सीमा सुरक्षा बल एसएसबीले तुइन काट्दा उक्त घटना भएको प्रत्यक्षदर्शीले बताएका छन् । घटनामा संलग्न भारतीय एसएसबी जवानलाई कारवाहीको दायरामा ल्याउन सरकारले ठोस पहल गर्नुपर्ने माग विज्ञप्तिमा गरिएको छ ।
विज्ञप्तिमा भनिएको छ, “उखु किसानसँग पटक–पटक सम्झौता गरेर पनि वर्षौँदेखि करोडौँ बक्यौता रकम किसानलाई नदिने, झुलाउने र अलपत्र पार्ने जुन जालझेल राज्यले गर्दै आएको छ त्यसको जोडदार विरोध गर्दै सर्लाही, रौतहट र नवलपरासीका उखु किसानको वर्षौँदेखिको बक्यौता हर्जाना र ब्याजसहित सम्पूर्ण रकम असुलउपर गरियोस् ।”
