काठमाडौं, ३ असार । सेयर बजारमा बुधबार करिब साढे ५२ अंकको गिरावट आएको छ । यो गिरावटसँगै समग्र नेप्से परिसूचक २ हजार ९ सय ६९.६९ बिन्दुमा ओर्लिएको छ । अघिल्लो दिनको तुलनामा यो १.७३ प्रतिशत घटेको हो ।
नियामक निकाय धितोपत्र बोर्डले मंगलबार चार दर्जनभन्दा बढी (५१ वटा) जोखिमयुक्त कम्पनीको नामवाली सार्वजनिक गरेको छ । कम्पनीको अवस्था राम्रो नभएका तर सेयरमा अस्वाभाविक मूल्य वृद्धि भएको तथ्यका आधारमा बोर्डले मंगलबार ती जोखिमयुक्त कम्पनीको नामावली सार्वजनिक गरेको थियो । तीमध्ये ४९ वटा कम्पनीको सेयर मूल्य बुधबार घटेको छ । सो दिन कारोबारमा आएकामध्ये लघुवित्तबाहेक सबै उपसमूहको परिसूचक घटेपछि समग्र नेप्सेमा दबाब परेको हो ।
बुधबार करिब १ लाख ६८ हजार कारोबारबाट २ सय १९ कम्पनीका २ करोड ८२ लाख ८९ हजार कित्ता सेयर किनबेच भए । ती किनबेचमा १५ अर्ब ४८ करोड रुपैयाँ बराबरको कारोबार भएको छ । अघिल्लो दिनको तुलनामा कारोबार रकम पनि कम हो ।
मंगलबार सेयर बजारमा १६ अर्ब ५२ करोड रुपैयाँ बराबरको सेयर कारोबार भएको थियो । नेप्से परिसूचक घटेसँगै सेयर बजारको आकार कुल बजार पुँजीकरण पनि घटेर ३९ खर्ब ९० अर्ब रुपैयाँमा सीमित भएको छ । अघिल्लो दिन कुल बजार पुँजीकरण ४१ खर्ब ७२ अर्ब रुपैयाँ थियो । बुधबार दोस्रो बजारमा भएको कुल कारोबारमध्ये सबैभन्दा धेरै नेपाल पुनर्बिमा कम्पनी र त्यसपछि हिमालयन डिस्टिलरीको रहेको तथ्यांकमा देखिन्छ । सो दिन नेपाल पुनर्बिमाको करिब ६१ करोड र हिमालयन डिस्टिलरीको करिब साढे ५५ करोड रुपैयाँ बराबरको सेयर कारोबार भएको छ ।
नेप्सेको वर्गीकरणमा ‘क’ वर्गमा रहेका कम्पनीहरूको सेयर कारोबार मापक सेन्सेटिभ परिसूचक बुधबार १.५६ र व्यापारमा रहेका सबै कम्पनीहरूको सेयर कारोबार माफक फ्लोट परिसूचक १.५३ प्रतिशतले घटेको नेप्सेले जनाएको छ । बुधबार कारोबारमा आएकामध्ये लघुवित्त उपसमूहको परिसूचक भने २.६३ प्रतिशत बढेको छ । कान्तिपुर दैनिकले खबर छापेको छ ।
