आफूलाई नेपाल प्रहरीको डाक्टर मेडिकल प्रहरी नायब उपरीक्षक (डीएसपी) बताउने एक व्यक्तिलाई प्रहरीले पक्राउ गरेको छ ।
पक्राउ पर्नेमा काठमाडौंको तारकेश्वर नगरपालिका–६, जरङगू बस्ने ४४ वर्षीय कृष्णप्रसाद ढुंगाना छन् । नेपाल प्रहरीको महानगरीय अपराध महाशाखाबाट खटिएको टोलीले उनलाई पक्राउ गरेको हो ।
उनले आफू ‘मेडिकल डाइरेक्टर हुँ’ भन्दै मेडिकल फर्म सञ्चालन गर्दै आएको प्रहरीले जनाएको छ । प्रहरीका अनुसार उनले नेपाल प्रहरीका कर्मचारीलाई सशस्त्र प्रहरीको डीएसपी र सशस्त्र प्रहरीका कर्मचारीलाई नेपाल प्रहरीको डीएसपी बताउने गरेका थिए । उनले नेपाल प्रहरीको प्रहरी नायब उपरीक्षकको पोसाक लगाएको फोटो आफ्नो फेसबुक प्रोफाइलमा राखेका थिए ।
उनले तारकेश्वर नगरपालिकामा भिक्टोरिया फार्मेसी सञ्चालन गर्दै आएको र त्यहीँबाट पक्राउ गरिएको महाशाखाले जनाएको छ । घटनाबारे थप अनुसन्धान भइरहेको जनाइएको छ ।
कोही व्यक्ति पक्राउ परेका ढुंगानाबाट पीडित भएको भए महानगरीय अपराध महाशाखामा सम्पर्क गर्न पनि अनुरोध गरिएको छ ।
