किरण न्यौपाने, रंगेली
अहिलेको कोरोनाको महामारी बिच धन भएर पनि सामाजिक कार्यमा मन नभएका धेरै छन्, तर रंगेली नगरपालिका ७ निवासी २८ वर्षिय अजय कुमार मण्डल एक्लैले यो महामारिमा जिम्मेवारी देखाएका हुन् । रंगेली नगरपालिकाले रंगेली अस्पतालमा सञ्चालनमा ल्याएको कोभिड हस्पीटललाई आज करिब डेढ लाख मुल्य बरावरको स्वास्थ्य सामाग्री एक्लैले उपलब्ध गराएका छन् । रंगेली ७ शुक्रवारेमा ईशान्त फार्मेसी सञ्चालन गर्दै आएका अजयले १ सय थान अक्सीजन सिलिण्डर रिफिलिङ्ग गर्नका लागि नगद ४० हजार रुपैया समेत उपलब्ध गराएका छन् । उनले भने – अहिलेको अवस्थामा पैसा कामाउनु भन्दा मानिसको स्वास्थ्य रक्षा गर्नु पर्ने सबैको सामाजिक जिम्मेवारी हो, मैले आफनो स्थानबाट सामाजिक दायित्व देखाएको हुँ । मण्डलले अग्रणी स्थानमा रहेर कोभिड हस्पीटल रंगेलीमा काम गरिरहेका स्वास्थ्यकर्मीहरुको स्वास्थ्य र विरामीहरुलाई अक्सीजनको कमीलाई ध्यान दिएर सहयोग गरेका हुन् । उनले ५ हजार थान सर्जिकल माक्स, १ सय २० थान सेनिटाईजर, चार प्याकेट ग्लोब्स, ५० थान फेस सिल्ड, एक सय काटुन पानी र कोभिड हस्पीटलकोे अक्सीजन सिलिण्डर रिफिलिङ्ग गर्नका लागि नगद ४० हजार रुपैया रंगेली स्वास्थ्य संयोजक ब्रजेश मेहता र रंगेली अस्पतालका मेसु रोहेन्द्र पाँडेलाई संयुक्त रुपमा हस्तान्तरण गरेका थिए ।
रंगेली अस्पतालका मेसु रोहेन्द्र पाँडेले स्थानिय युवा अजय कुमार मण्डलबाट प्रदान गरेको स्वास्थ्य सामाग्री र कार्यको प्रशंसा गर्दै आफुहरुकोे थप हैसला बढेको बताए । यता स्वास्थ्य शाखा प्रमुख ब्रजेश मेहताले स्वास्थ्य क्षेत्रमै सेवामा लागेका अजयले यो महामारीमा देखाएको मनकारी सहयोगका लागि साच्चिकै धान्यवादको पात्र रहेको प्रतिक्रीया दिए ।
