पथरी, मोरङको पथरी शनिश्चरेमा कोरोना संक्रमणको दर तीव्ररुपले बढिरहेको छ । पछिल्लो पटक ४० जनाको स्वाब संकलन गरी प्रदेश ल्याबमा पठाइएको रिपोर्टमा २९ जनामा कोरोना देखा परेको स्वास्थ्य शाखाले जनाएको छ । योसंगै हालसम्म संक्रमितको संख्या ९१ पुगेको छ भनें ६ जनाको निधन समेत भएको छ । हिजो २६ जनाको र आज ३९ जनाको पीसीआर परीक्षणका लागि स्वाब संकलन गरिएको स्वास्थ्य शाखाले जनाएको छ ।
नगरका कोरोना भाइरस संक्रमितहरुका लागि आइसोलेसनको निर्माण कार्य अन्तिम चरणमा पुगेको जनाइएको छ । नगरमा ६ जनाको निधन भइसक्दा नगरपालिका टायल बिछ्याउन धमाधम लागि परेको छ । आइसोलेसनका रुपमा खडा गरिएको वडा नम्बर २ मा रहेको नगर अस्पतालको नवनिर्मित भवनमा टायल विछ्याउने र भवन अगाडि माटोपुर्ने काम भएको छ । आज नगर प्रमुख दिलीपकुमार राई, उपप्रमुख यमुना विष्ट वास्तोला, जनस्वास्थ्य निरीक्षक मुरारी आचार्य आइसोलेसन स्थल निर्माणमा खटेका थिए ।
यस सन्दर्भमा, नगर प्रमुख राई र उपप्रमुख वास्तोलाले नगरवासीलाई घर घरमै सुरक्षित रुपमा बसेर मात्र कोरोना संक्रमणबाट बच्न सकिने उल्लेख गर्दै सवैलाई घरमै वस्न अनुरोध गर्नुभएको छ । निषेधाज्ञालाई वडा वडामा झनै कडाई गर्नु आवश्यक रहेको उहाँहरुले जनाउनु भयो । कोरोना संक्रमण बढेपछि नगरमा जेठ २ गते राती १२ बजेदेखि अर्को सूचना नभएसम्मका लागि औषधि बाहेकका सवैखाले पसल, व्यवसाय र आवतजावत बन्द गर्ने निर्णय भएको छ ।
