रतुवामाई, मोरङको रतुवामाई नगरपालिकाले कोरोना भाईरसबाट विद्यार्थीहरु जोखिममा रहेकाले एक साता विद्यालय बन्द गर्ने निर्णय गरेको छ । यस्तै सिमा—नाकामा आवात जावतमा पनि कडाई गर्ने भएको छ ।
रतुवामाई नगरपालिकामा बसेको कोभिड—१९ संकट व्यवस्थापन समितिको बैठकले नगरभित्रका विद्यालय बैशाख १४ गतेदेखी बैशाख २० गतेसम्म बन्द गर्ने निणर्य गरेको हो । वैठकले विद्यार्थीको अध्ययन तथा परीक्षाको तयारी घरमै गर्न भनेको छ । रतुवामाई नगरबासीको स्वास्थ्य सुरक्षाको लागि जनस्वास्थ्य सम्बन्धि मापदण्ड कडाईका साथ लागु गराउने र टोलटोलमा कोभिड रोकथाम सम्बन्धि जनचेतनामुलक माइकिङ गरिने भएको छ ।
बैठकले सार्वजनिक स्थानमा भिड नगर्न,अनिवार्य मास्क तथा सेनिटाईजरको प्रयोग गर्न अनुरोध गर्दै नियमको उल्लघन गरे नियम अनुसार सुरक्षाकर्मीद्धारा अनुगमन गरी कारवाही गरिने बताइएको छ ।
यसैगरी कोरोना नियन्त्रणका लागि नगरपालिकाले सिमा नाकामा आवातमा कडाई गर्ने भएको छ । बिवाह, ब्रतबन्ध, धार्मिक तथा साँस्कृतिक कार्यक्रम, सभा सम्मेलन आदि क्रियाकलापको लागि नेपाल सरकारले तोकेको संख्यामा भन्दा बढि नहुने गरी सम्पन्न गर्न गराउने कार्य कडाईका साथ पालना गर्नका लागि निर्णय समेत गरेको छ ।
झुर्कियामा रहेको नगर अस्पताल भित्र रहेको अस्थायी कोभिड अस्पतालबाट १५ शैय्या सम्मको उपचार लागि थप व्यवस्थित बनाईने नगरप्रमुख रविन राईले बताउनुभयो ।