पथरी, मोरङको पथरी शनिश्चरे नगरपालिकामा रहेका शैक्षिक संस्थाहरु मंगलबारबाट बन्द गर्ने निर्णय भएको छ ।
नगरमा गठन भएको कोरोना भाइरस न्यूनिकरण नगर स्तरीय समन्वय समितिको सोमबार बसेको बैठकले सो निर्णय गरेको हो । बैठकले नगरमा रहेका सम्पूर्ण शैक्षिक संस्था, जिमहल, अध्ययन केन्द्रहरु, स्वीमिङ पुल, हेल्थ क्लव, सिनेमा हल, साप्ताहिक हाटबजारहरु बन्द गर्ने निर्णय गरेको हो ।
नगरमा परीक्षा चलिरहेका शैक्षिक संस्थाहरुले स्वास्थ्य मन्त्रालयले सिफरिस गरेको स्वास्थ्य मापदण्डको अधिकतम पालना गरेर परीक्षा संचालन गर्न भनेको छ । यस्तै २५ जनाभन्दा वढि भेला भएर सञ्चालन गरिने कुनैपनि कार्यक्रम, दर्शकहरु भेला भएर गरिने कार्यक्रमहरु तथा सभा समारोह समेत नगर्न समितिले निर्देशन गरेको छ ।
यस्ताे छ निर्णय
समितिले नगरमा स्थाइ बासोबास भएको तर बैदेशिक रोजगारबाट आउने भएमा अनिवार्य १० दिन होम क्वारेन्टिनमा बस्न पनि निर्देशन गरेको छ । नेपाल सरकार, प्रदेश सरकार तथा स्थानीय सरकारले गरेको निर्णयलाई अटेर गरेमा स्थानीय प्रशासनले कानुनी कार्वाही गर्ने समेत निर्णय भएको छ ।
सरकारले शैक्षिक संस्थाहरु बन्द गर्न निर्देशन गरेपनि नगरमा सबै शैक्षिक संस्थाहरु सोमबारसम्म खुल्ला रहेका छन् । प्रदेश २ केही स्थानहरुमा भने सरकारको निर्णय नमानेको भन्दै दर्जन वढि प्रिसिपलहरुलाई प्रहरीले पक्राउ गरेको छ ।
