पथरी, मोरङको पथरी शनिश्चरे नगरमा चैत २० गतेबाट सुरु हुने हात्तीपाइले रोग विरुद्धको आम औषधि सेवन कार्यक्रमका बारेमा आज स्थानीय पत्रकारहरुसँग अन्तरक्रिया कार्यक्रम गरिएको छ ।
कार्यक्रममा नगर प्रमुख दिलीपकुमार राईले औषधि सेवन कार्यक्रमलाई प्रभावकारी बनाउन नगरका रहेका पत्रकारहरुको महत्वपूर्ण भूमिका रहने भएको उल्लेख गर्दै उहाँहरुसँग समाचार तथा सूचनामार्फत अभियानको प्रचार प्रसारको अपेक्षा व्यक्त गर्नुभयो । चैत २० देखि २६ गतेसम्म स्वास्थ्यकर्मी र महिला स्वास्थ्य स्वयमसेविकाले घर घरमा पुगेर औषधि सेवन गराउने कार्यक्रम रहेको प्रष्ट्याउदै उहाँले नगरवासीलाई अनिवार्य औषधि सेवन गर्न आव्हान समेत गर्नुभयो ।
कार्यक्रममा स्वास्थ्य शाखाका जगत मगरले हात्तीपाइले रोग, त्यस विरुद्ध औषधि सेवन लगायतका बारेमा सहजिकरण गर्नुभयो । चैत १९ गते नगरमा औषधि खाएर अभियानको उद्घाटन् गरी २० गतेबाट घर घरमा पुगेर औषधि सेवन गराइने छ । गर्भवती, ७ दिनसम्मको सुत्केरी, जटिल रोगी र ओछ्यान परेका विरामी, २ वर्ष मुनीका बालबालिकाले बाहेक अन्य सबैले औषधि सेवन गर्न हुने जनाइएको छ ।
नगरले गत वर्ष ५७ हजार ६ सय ३६ जनालाई औषधि सेवन गराएर लक्ष्यको ९१ प्रतिशत सफलता हासिल गरेको थियो । औषधि सेवन गर्न नहुने समूह छुट्याएर यस वर्ष ६१ हजार ७ सय ३६ जनालाई औषधि सेवनको लक्ष्य बनाइएको छ ।
