विराटनगर : मोरङको बेलबारी नगरपालिका–३ स्थित लोहोन्द्रा खोलानजिक बेवारिसे अवस्थामा एक पुरुषको शव भेटिएको छ।
पिपलको रुख मुनी म्याट ओछ्याएर झोलाको सिरानी लगाएर सुतिरहेको अवस्थामा शव भेटिएको मोरङ प्रहरीले जनाएको छ ।
मृत भेटिएका अन्दाजी ५५ वर्षीय पुरुषको पहिचान खुलेको छैन। आफन्त वा पारिवारिक नाता सम्बन्धका कोही पनि सम्पर्कमा नआएको प्रहरीले जनाएको छ ।
बाटो हिँड्ने बटुवाले पिपलको रुखमुनि शव देखेपछि प्रहरीलाई खवर गरेका थिए। स्थानीय बासिन्दाले दिएको जानकारी अनुसार मृतक केही समय अघिदेखि बेलबारी क्षेत्रमा मागी खाएर हिँड्थे ।
प्रहरीले बिरामी परेर वा शारीरिक रुपमा कमजोर भएका कारण सुतेकै ठाउँमा उनको मृत्यु भएको हुनसक्ने अनुमान गरेको छ।
प्रहरीले घटनास्थलबाट उठाउँदै शव पोस्टमार्टमका लागि धरानस्थित बीपी प्रतिष्ठान लगेको छ।
