ताप्लेजुङमा ब्रेक फेल भएर सोमबार राति टिपर दुर्घटना हुँदा एक जनाको मृत्यु भएको छ ।
दुई जना गम्भीर घाइते भएका छन् । पाथीभरा यमबरक–४ स्थित भित्री ग्रामीण सडक खण्डमा फुङलिङबाट डुम्रिसेतर्फ जाँदै गरेको प्र ३–०१–०५ ख ९२७१ नम्बरको राति ११ बजेतिर दुर्घटनामा परेको हो । बाटो मोड्ने क्रममा ब्रेक फेल भएर दुर्घटनामा परेको टिपर सडकबाट अन्दाजी २५ मिटर तल खसेको थियो ।
दुर्घटनामा टिपरका सह–चालक लमजुङ घर भएका १७ वर्षीय कृष्ण विकको ज्यान गएको हो । दुर्घटनामा परेर गम्भीर घाइते भएका उनको उपचारका लागि लैजाँदै गर्दा बाटैमा मृत्यु भएको प्रहरीले जनाएको छ । टिपरका चालक सिन्धुली घर भएका २४ वर्षीय होमकुमार विक र अर्का चालक ताप्लेजुङ पाथीभरा यङबरक– २ का २० वर्षीय मन्दीप लिम्बू गम्भीर घाइते भएका छन् ।
दुवै जनालाई उपचारका लागि झापातर्फ पठाइएको प्रहरीले जनाएको छ । टिपरलाई नियन्त्रणमा लिएर घटनाको अनुसन्धान थालिएको प्रहरीको भनाइ छ ।