पथरी, मुक्ती दाहालको निष्पक्ष छानविन गर्नका लागि भन्दै मदन भण्डारी प्रतिष्ठानले समिति गठन गरेको छ । छानविन समिति गठन भएसंगै प्रतिष्ठानका कार्यकारी निर्देशक बिनोद अर्याललाई तत्कालका लागि प्रतिष्ठानको कुनैपनि काम नगर्न प्रतिष्ठानले निर्देशन गरेको छ ।
दाहाल मोरङको उर्लाबारीमा रहेको मदन भण्डारी स्मृति प्रतिष्ठान नेपाल अन्तर्गत रहेको बहुप्राविधिक शिक्षालयमा कार्यरत लेखा तथा प्रशासन प्रमुख थिए । दाहालले दमक ४ ताराबारीमा रहेको कार्यालयमा नै गत सोमबार झुण्डिएर देह त्याग गरेका थिए । दाहालको देहत्यागका विषयमा प्रतिष्ठानका निर्देशक अर्याल र प्रतिष्ठानकै अध्यक्ष गुरु बरालको मानसिक तनाव रहेको भन्दै परिवार, आफन्त र प्रतिष्ठानकै केही कर्मचारीहरुले आवाज उठाएपछि छानविन समिति बनाउन बाध्य भएको हो ।
छानविन समितिमा राष्ट्रियसभाका पूर्वसदस्य हरिचरण शिवाकोटीको नेतृत्वमा शनिबार समिति गठन भएको विज्ञप्तीमा जनाइएको छ । भर्चुअल माध्यमबाट मदन भण्डारी स्मृति प्रतिष्ठानको कार्यसमितिको बैठकले घट्ना र घट्ना अघि–पछिका सम्पूर्ण अवस्थाको अध्ययन, अनुसन्धान र सत्यतथ्य कारण पत्ता लगाउन राष्ट्रियसभाका पूर्वसदस्य हरिचरण शिवाकोटीको संयोजकत्वमा ७ सदस्यीय समिति गठन भएको जनाइएको छ । प्रतिष्ठानका अध्यक्ष गुरूप्रसाद बरालद्वारा जारी विज्ञप्तिमा उल्लेख भएअनुसार सो समितिमा सदस्यहरू क्रमशः उर्लाबारी नगरपालिका उपमेयर लक्ष्मीदेवी भण्डारी, सुमित्रा भण्डारी, नारायण वस्ती, खोमप्रसाद बगाले, सोम निरौला र भोला दाहाल रहेका छन् ।
स्रोतका अनुसार निरौला मृतक दाहालका सहोदर मामा हुन् भने दाहाल जेठा दाजु हुन् । परिवारजन समेत सङ्लग्न सो समितिले १५ दिनभित्र छानविन कार्य सम्पन्न गरी प्रतिवेदन कार्यसमितिमा पेश गर्नुपर्ने प्रतिष्ठान बैठकको निर्णय रहेको विज्ञप्तिमा उल्लेख छ ।
घटना घटेलगत्तै उत्रिएको भीडले कार्यकारी निर्देशक विनोद अर्यालले आत्महत्याका लागि दुरुत्साहन गरेको आरोपमा उहाँको निलम्बनको माग गरेको थियो । अध्यक्ष बरालले पनि तत्काल राजिनामा दिनुपर्ने माग सहित स्थानीयको भिडले बराललाई समेत आक्रमण गरेको थियो ।
यता प्रतिष्ठानको बैठकले घटनाको छानविन पक्रिया पूरा नहुञ्जेलसम्मका लागि निर्देशक अर्याललाई कार्यालयको सम्पूर्ण कामकाजबाट अलग्याउँदै कुनै पनि प्रकृतिको काम कारबाही नगर्न निर्देशन दिएको जारी विज्ञप्तिमा उल्लेख छ । बरालका अनुसार दाहालको देहत्यागको वास्तविक सत्यतथ्य पत्ता लगाउन र दाहाल परिवारलाई न्याय दिलाउन प्रहरी प्रशासनलाई सहयोग गर्न प्रतिष्ठान कार्यसमिति र प्रतिष्ठान परिवार प्रतिबद्धताका साथ लाग्ने निर्णय भएको छ । विज्ञप्तिमा उल्लेख भएअनुसार बैठकले दिवंगत दाहालको अनुपस्थितिमा उहाँकी श्रीमती शान्ता अधिकारी दाहाललाई प्रतिष्ठानको सेवाक्षेत्रमा स्थायित्व कायम गर्ने र उहाँका छोराहरू इशान र श्रेयन दाहालको स्नातकोत्तर तहसम्मको अध्ययनलाई निरन्तरता दिन प्रतिष्ठानले अभिभावकत्व ग्रहण गर्ने निर्णय समेत गरेको छ ।
अहिलेपनि विद्यार्थी र आफन्तले दाहालको स्वेच्छिक मृत्यु नभएर दुरुत्साहन नै भएको भन्दै आन्दोलन चर्काइरेहका छन् ।
यस्तो भएको थियो दाहालको घरमा
