गत वर्ष साँघुरो पालिखेचोकलाई फराकिलो बनाइएपछि महानगरले सो स्थलमा सुन्दर गार्डेन बनाएको हो । आज ४७ औं विश्व वातावरण दिवसको अवसरमा गण्डकी प्रदेशका मुख्यमन्त्री पृथ्वीसुव्वा गुरुङले सो गार्डेनको औपचारिक उद्घाटन गरे । सो अवसरमा उनले पर्यटकीय नगरि पोखरालाई पार्कको सहरका रुपमा विकास गर्नुपर्नेमा जोड दिए ।
पोखराको मनोरम प्राकृतिक सुन्दर्यता यहाँको वातावरणीय स्वच्छताको उपज समेत रहेको बताउँदै उनले वातावरण संरक्षण गर्दै पर्यापर्यटनको विकास गर्न आग्रह गरे ।
पोखरा महानगरपालिकाका प्रमुख मानबहादुर जिसीले साँघुरो चोकलाई फराकिलो बनाएर सौन्दर्यकरण गरिएको बताउँदै महानगरले परिणाम देखिने गरि काम गरिरहेको बताए।
वडा नं ४ का वडाध्यक्ष शंकर बास्तोलाले सो स्थानमा रहेका घर जग्गाको मुआव्जाको लागि महानगरपालिकाले दुई करोड ७३ लाख रुपैया लगानी गरेको जानकारी दिए ।महानगरले वर्षोदेखी समस्याको रुपमा रहेको पालिखेचोकलाई फराकिलो बनाउन वडाध्यक्ष बास्तोलाको संयोजकत्वमा समिति बनाएको थियो ।
सो समितिले जग्गाधनीसँगको पटक पटकको छलफल तथा वार्ताबाट मुआव्जा दिलाएर सडक चौडा बनाउने काम टुँगाएको थियो । सो डिभाइडर गार्डेनका लागि रु ६३ हजार लगानी भएको बताइन्छ ।
महानगर प्रमुख मानबहादुर जिसीले आजनै नदीपुर स्थित प्रकृति उद्यान पार्कमा वृक्षरोपण गर्नुभएको छ । सुर्योदय युवा क्लबद्धारा सञ्चालित सो पार्कलाई महानगरले स्तरोन्नती गरी थप सौन्दर्यीकरण र खुला व्यायामशालाको रुपमा विकास गर्ने योजना बनाएको प्रमुख जिसीले बताए ।
