भिमराज अधिकारी, पथरी
देशभर लकडाउन कडा बनाउन सरकारको निर्देशन आइरहेका बेला मोरङको पथरीमा भने स्थानीयले लकडाउनको बेवास्ता गरेका छन् । हरेक दिन विहान खुल्ने पसलहरुमा लाग्ने घुइचोका अगाडी प्रशासन भने निरिह बनेको छ ।
सागसब्जी, खाद्यान्न, औषधी लगाएतका अत्यावश्यक पसलहरु मात्रै खुल्ला गर्ने निर्णय नगरले गरेको छ । नगरको निर्णय र प्रशासनको वेवास्ता गर्दै नगरपालिका भवनकै तल्लो तलामा भने कस्मेटिक देखि धगो, जुत्ता लगाएतका पसलहरु निर्वाद रुपमा संचालनमा रहेका छन् । दैनिक विहान १० बजे सम्मका लागि अत्यावश्यक सामग्रीका पसलहरु मात्रै खोल्न अनुमति दिइएको भएता पनि व्यावसायीहरुले अटेर गरेर पसल खोल्दै आएका हुन् । पथरी बजारका फर्निचर, कपडा पसल, भाँडा पसल, मोवाइल, घडी पसल, साइकल पसल, जुत्ता चप्पल पसल लगाएतका व्यावसायहरु खुलेका हुन् ।
लकडाउनको कडा पालना गराउनका लागि खटेको नेपाल प्रहरीले भने बजारको भिड भन्दा पनि मोटरसाइकल मात्रै देख्ने गरेको छ । घुइचो लागेको बजारलाई व्यवस्थापन गर्नुको सट्टा कता मोटर साइकल छ त्यता मात्रै प्रहरीको ध्यान केन्द्रित हुनेगरेको छ । पैदल यात्री र साइकलमा यात्रा गर्नेको घुइचो भने थामिनस्कनु छ पथरी बजारमा ।
नगरले जति नै कडा गरेता पनि अटेरी गरेको नगर उप प्रमुख यमुना विष्टले बताउनुभयो । ‘‘पटक पटक सूचना गर्दा पनि कसैले वास्ता गरेनन् अब कार्यपालिकाको बैठकबाट के निर्णय हुन्छ त्यही कुरेर बसेकी छु’’ विष्टले भन्नुभयो ‘‘अब कोरोनाको झन महामारी आउने अवस्था छ सबैले आफुले सचेत भएर घरमा बस्नुको विकल्पै छैन् ।’’