तनहुँ : गण्डकी प्रदेशमा प्रवेश गर्ने सवारी साधनलाई निसङ्क्रमण (डिसइन्फेक्सन) गर्न शुरु गरिएको छ । प्रदेशको मुख्य नाका तनहुँको आँबुखैरेनी गाउँपालिका–४ पुलजीपमा सवारी साधन निसङ्क्रमण गर्न शुरु गरिएको हो ।
कोरोना रोकथाम, नियन्त्रण तथा उपचार जिल्लास्तरीय समन्वय समितिले सवारी तनहुँमा प्रवेश गर्न सवारी साधनलाई निसङ्क्रमण गरेपछि मात्रै प्रवेशको व्यवस्था मिलाउने निर्णय गरेसँगै आँबुखैरेनी गाउँपालिकाको समन्वयमा कोरसोलिन (भाइरस नष्ट गर्ने औषधि) टिएचबाट सवारी साधन निसङ्क्रमण गर्न थालिएको गाउँपालिकाका अध्यक्ष गीरबहादुर थापाले जानकारी दिए ।
गण्डकी प्रदेशमा आउने सबैखालका सवारी साधनलाई निसङ्क्रमण गरेपछि मात्रै प्रवेश दिइनेछ, अध्यक्ष थापाले भने, ‘यसले प्रदेशलाई सुरक्षित राख्न सहयोग पुग्नेछ ।’ सवारी साधनलाई निसङ्क्रमण गर्न भेटेरेनरी अस्पताल तथा पशु सेवाविज्ञ केन्द्र तनहुँले कोरसोलिन टिएच औषधी गाउँपालिकालाई उपलब्ध गराएको छ ।
विज्ञ केन्द्रका प्रमुख डा. बालकुमार श्रेष्ठका अनुसार पहिलो चरणमा पाँच दिनलाई पुग्ने औषधि गाउँपालिकालाई उपलब्ध गराइएको र थप औषधि पनि उपलब्ध गराइनेछ । सवारी साधन निसङ्क्रमण गर्नका लागि आँबुखैरेनी गाउँपालिका–४ पुलजीपस्थित युवा क्लबका युवाहरु खटिएका छन् । बन्दाबन्दीका क्रममा पृथ्वी राजमार्ग हुँदै दैनिक २५० भन्दा बढी सवारी साधन गण्डकी प्रदेश भित्रिने गरेका छन् ।
उक्त ठाउँमा गाउँपालिकाले स्वास्थ्य सहायता कक्षसमेत राखेको छ । स्वास्थ्य सहायता कक्षबाट प्रदेश प्रवेश गर्ने सबैको ज्वरो मापन गर्ने कार्य भइरहेको छ । त्यसका लागि गाउँपालिकाले स्वास्थ्य सहायता कक्षमा दुई स्वास्थ्यकर्मी खटाएको छ ।
त्यस्तै, इलाका प्रहरी कार्यालय आँबुखैरेनी, सशस्त्र प्रहरी बल मनकामना गणबाट उक्त नाकामा चौबिसै घण्टा प्रहरी परिचालन गरिएको इप्रका आँबुखैरेनीका प्रहरी निरीक्षक बुद्धिप्रसाद सुवेदीले जानकारी दिए । पुलजीपमा राखिएको स्वास्थ्य सहायता कक्षबाट एक हजार ९०८ जनाको स्वास्थ्य परीक्षण गरिएको छ । गाउँपालिकाका अनुसार तीमध्ये १५३ महिला र एक हजार ७५५ पुरुष छन् ।
