रंगेली, कोरोना भाईरसको संक्रमण फैलिन नदिन सरकारले जारी गरेको लकडाउनले न्युन आयस्रोत भएका परिवारलाई समस्या उत्पन्न हुन थालेपछी रतुवामाई नगरपालिकाले विपन्न परिवारको विवरण संकलन गरि राहत उपल्वध गराउने भएको छ । रतुवामाई नगरपालिका क्षेत्र भित्रका विपन्न परिवारको दैनिक जिविकमा समस्या प्रति मेयर रविन राई गम्भीर हुदै राहत उपल्वध गराउनका लागी प्रक्रिया अधि बढाएका हुन् ।
मेयर राईले नगरपालिका क्षेत्रका १० वटै वडामा लकडाउनले दैनिक ज्यालादारी गरेर खाने मजदुर र विपन्न वर्गका परिवारको पहिचान गरी विपद कोष बाट आवश्यक खाद्यान्न उपल्वध गराउने बताए । उहाले सबै वडाहरु बाट त्यसको तथ्याङ्ग संकलन गरेर जनतालाई राहत उपल्वध हुदा सबै पक्ष जिम्मेवार भई अति विपन्न परिवारलाई प्राथमिकता राख्नका लागी आग्रह समेत गरेका छन् ।
सो क्रममा मेयर राईले आज लकडाउनको असरले दैनिक ज्यालादारी गरेर खाने मजदुर तथा विपन्न परिवारहरु संग प्रत्यक्ष भेटघाट गरेर उनीहरुको गुनासो समेत सुनेका छन् ।
साथै नगरपालिकाले नगर क्षेत्रमा अत्यावश्यक खाद्यान्न लगायतको अभाव नहुन स्थानीय पसल व्यवसायी संग भएको मौज्दातको विवरण समेत संकलन थालेको छ भने बजारमा इन्धनको अभाव हुन नदिन त्यसको निगरानी र पहल समेत थालेका छन् ।
नगरपालिकाले अत्यावश्यक खाद्यान्न र साग सब्जी तथा फलफूल को विक्रि वितरण गर्न भिडभाड नहुने गरी दैनिक बिहान ७ देखि ८ बजे सम्म र अपरान्ह ४ देखि ६ बजे समय सम्म पसल खोल्न तथा साग सब्जी र फलफूल क्रेता विक्रेताहरु बिच दुरी कायम राखेर कारोवार गराउने निर्णय गरेको छ
