नरेस कुमार लाभ, बिराटनगर
विश्वभर कोरोनाको त्रास बढि रहेका बेला रानी भन्सारमा भने परीक्षण नै नगरी बिराटनगर प्रवेश गर्न दिइने गरेको छ । मोरङको जोगवनी स्थीत रहेको रानी भन्सारमा कोरोना भएको नभएको पत्ता लगाउनका लागि कोरोनाका लक्षण जाच्ने डेक्स स्थापना गरिएको छ । तर सामान्य यात्रु बाहेक अरुलाई परीक्षण नै नगरि प्रवेश दिने गरेको पाइएको हो ।
सामान्य पैदल यात्रुलाई ज्वरो आएको नआएको जाँच गर्ने र कोरोनाबाट बच्ने उपाए लेखिएको पम्प्लेट दिने गरिएको छ । सोही बाटो हुदै भारतको युपि बिहारबाट नेपाल भित्रिएका दुईवटा बस भने बिना चेकजाँच बिराटनगर आइपुगेका छन् । आखाको उपचारका लागि बिआर २८ पि ०६९० र बिआर २८ जि ३००८ नं. का दुई वटा बसमा करिब ८० जना भारतिय बिराटनगर १३ मा रहेको बिराट आखा अस्पताल आएका छन् । उनिहरुले बोर्डरमा कुनैपनि चेकजाँच नभएको र आफुहरु बसबाट सिधै आखा हस्पिटल आएको बताए ।
बोर्डरमा कोरोना चेकजाँचका लागि उषा मेहता र लिलम यादवलाई खटाइएको छ । आफुहरु डेक्समा बसेर निरन्तर जाँच गरिरहेको उषा मेहताले बताइन् । बाहिरबाट आउनेलाई प्रहरीले चेकजाँचका लागि पठाउने र आफुहरुको काम चेकजाँच गर्ने मात्रै काम रहेको मेहताको भनाइ छ । प्रहरीले भने बिहारका दुईवटा बसलाई बिना चेकजाँच बिराटनगर प्रवेश गर्न छुट दिएको पाइएको हो । यसरी गरिने गम्भिर लाहपर्वाहीले विश्वमा फैलिएको कोरोना नेपालमा सिधै प्रवेश गर्ने देखिन्छ ।
