नेपाल कम्युनिष्ट पार्टी (नेकपा) को भातृसंगठन अखिल नेपाल नेपाल राष्ट्रिय स्वतन्त्र विद्यार्थी यूनियन (अनेरास्ववियू) को एकता भएसँगै उदयपुर जिल्लामा पनि अनेरास्ववियू जिल्ला कमिटीले पूर्णता पाएको छ ।
तत्कालिन एमाले निकट अनेरास्ववियूबाट २९ सदस्य र पूर्व माओवादी निकट अनेरास्ववियू क्रान्तिकारीबाट २६ सदस्य गरी ५५ जनाको जिल्ला कमिटी बनेको हो । अनेरास्ववियू जिल्ला संयोजक बिमल कार्की, सह–संयोजक सरोज अधिकारी, अनेरास्ववियूका केन्द्रिय सदस्यहरु भरत घिमिरे, रामशरण चौधरी र केशव चाम्लिङ राईको संयुक्त उपस्थितिमा अनेरास्ववियू उदयपूर जिल्ला कमिटीले आईतबार पूर्णता पाएको हो ।
अनेरास्ववियू जिल्ला संयोजक र सह–संयोजक दुवै रहने गरी ५५ जनाको जिल्ला कमिटी घोषणा गरिएको हो । अनेरास्ववियू उदयपूरले ७ कार्यलय सदस्य र १९ सचिवालय सदस्यसहित ८ वटै स्थानिय तह र जिल्लाका मुख्य क्याम्पसहरुको संयोजक र सह–संयोजक पनि टुङ्गो लगाएको छ ।
जिल्ला संयोजक बिमल कार्की, सह–संयोजक सरोज अधिकारी सहित विजय कार्की, प्रवेश ठकुरी, सिताराम राउत, केशव मगर र सिमा श्रेष्ठ कार्यलय सदस्यमा छन् ।
