भीमराज अधिकारी, पथरी
कोरोना भाइरसको प्रकोप बढ्न सक्ने भन्दै मोरङको उर्लाबारीमा सचेतना कार्यक्रम थालिएको छ । युवा जागरण नेपाल उर्लाबारीको आयोजनामा बुधबार देखि सो क्षेत्रका सामुदायिक विद्यालयहरुमा सचेतना कार्यक्रम सुरु गरिएको अध्यक्ष अर्जुन बास्तोलाले जानकारी दिनुभयो । पहिलो चरणमा सामुदायिक र सो पछि संसथगत तथा आसपासका पालिकाहरुमा पनि यस्तो सचेतना कार्यक्रम गरिने बास्तोलाले बताउनुभयो ।
आज पहिलो दिन वडा नं. ८ को लक्ष्मी मावि, वडा नं. ९ को अरनिको मावि, ७ को राधिका माविका विद्यार्थीहरुलाई सचेतना गरिएको छ । सो विद्यालयमा कक्षा ७ देखि माथि अध्ययन गर्ने करिब ५ सय बढि विद्यार्थीहरुलाई सचेतना गरिएको सचिव तिलक नेपालीले जानकारी दिनुभयो । भोली विहिबारसुनपकुवा मावि, सुनझोडा मावि, राधिका माविमा सचेतना कार्यक्रम गरिने नेपालीले जानकारी दिनुभयो ।
कोरोनाका बारेमा युवा जागरण नेपालका सल्लाहकार रुद्र बहादुर तामाङले सहजीकरण गरिरहनुभएको छ । उर्लाबारीमा कोरोना भित्रिनबाट जोगिनका लागि अपनाउन सकिने सावधानी, यदि कोरोना आइहालेमा अरुलाई सर्नबाट जोगिने उपाएका बारेमा सचेतना गरिएको तामाङले बताउनुभयो ।
