पथरी, १८ वुँदे निर्णय पारित गर्दै मोरङको पथरी शनिश्चरेको छैटौं नगरसभा आज सम्पन्न भएको छ ।
हिँउदे अधिवेशनका रुपमा रहेको नगरसभाको आजको वन्दशत्रले पर्यटन भ्रमण वर्षको अवसरमा नयाँ वर्षमा बृहत कार्यक्रम गर्ने सहितका निर्णय पारित गरेको प्रवक्ता यामप्रसाद गुरागाईंले जानकारी गराउनु भयो ।
उहाँले, सहकारी विधेयक र वातावरण तथा प्राकृतिक संरक्षण विधेयक पारित गर्नुका साथै वैदेशिक दातृ निकायसँग आर्थिक तथा प्राविधि सहायता लिने र भगिनी सम्वन्ध स्थापित गर्न पहल गर्ने पनि निर्णय भएको वताउनु भयो । नगरको अव्यवस्थित सहितको बसोवासको उचित समाधानका लागि प्रदेश सरकारले समेत पहल गरिदिन अनुरोध गर्ने समेत निर्णय गरिएको जनाउनु भयो ।
यसका साथै, नगरसभाले हसन्दहमा र वडा नम्वर ६ र ८ को सिमानाबाट कानेपोखरी ४ जोडने डाँसखोलाको झोलुंगे पुल क्षेत्र नजिकमा प्रहरी चौकी स्थापना गर्न सम्वन्धित मन्त्रालयमा माग गर्ने, रासायनिक वस्तु विस्थापित गरी अर्गानिक नगर बनाउने सहितका निर्णय भएका छन् । वडा नम्वर १० को जिरिखिम्ती खण्डको पूर्वपश्चिम मुख्य सडक र त्यहाँको जग्गाको नक्सा मिलाउन सर्पट नापी गर्ने पनि निर्णय भएको छ ।
यसका साथै चालु आर्थिक वर्षमा ठेक्काबाट बचेको १ करोड ५१ लाख १३ हजार ३ सय ३९, बुद्धमार्ग कालोपत्रेका लागि ठेक्काबाट बचेको ५० लाख तथा पाचौं नगरसभाबाट स्वीकृत भई निकासा थपघटका लागि विनियोजित रकमबाट व्यवस्थापन गर्नेगरी कुल ३ करोड ६३ लाख ४२ हजार ८२ रुपैयाँ वच्न पुगेको जानकारी गराइएको छ । सो रकमबाट ५४ वटा योजना बनाइएको छ ।
यसैगरी, पाँचौ नगरसभामा विषयगत क्षेत्रलाई स्वीकृत गरेको रकमको शिर्षकगत योजना कार्यक्रम अन्तर्गत १ करोड २३ लाख १० हजार बजेटको योजना संसोधित गरिएको छ । तथा वडा समितिबाट पेश भएका २६ योजना पनि नगरसभाले संसोधित गरेको छ । चालु आर्थिक वर्षको अवको अवधिमा ठेक्का प्रक्रियाबाट रकम वचत हुँदाको खण्डमा ७ वटा योजना सञ्चालन गर्ने समेत तय गरिएको छ ।
नगरसभाले, डीएसपीको दरवन्दी रहेको इलाका प्रहरी कार्यालय पथरीको भवनको व्यवस्थापन, वडा नम्वर ६ र कानेपोखरी ४ जोड्न डाँसखोलामा पक्कीपुल, १० नम्वरको त्रिवेणी चोकबाट जिरिखिम्तिी जोड्न डाँस खोलामै पक्कीपुल, ५ नम्वरको पौडेल चोकबाट मौलीबारी जोड्ने बक्राहा खोलामा पक्कीपुल, पथरी खोला तटवन्ध सहितका २२ वटा योजना मन्त्रालय तथा सम्वन्धित निकायमा पेश गर्ने पनि निर्णय गरेको छ ।
नगर प्रमुख दिलीपकुमार राईको अध्यक्षतामा सम्पन्न नगरसभामा नगर उपप्रमुख यमुना विष्ट वास्तोलाले संसोधित योजना सहितका कार्यक्रमहरु पेश गर्नुभएको थियो । नगरसभाको हिजो प्रदेश १ का सामाजिक विकास मन्त्री जीवन घिमिरेले खुल्ला सत्रको उद्घाटन गर्नुभएको थियो ।
