भीमराज अधिकारी, पथरी
तराइमा पनि पिउने पानीको हाहाकार नै मच्चिने गरेको छ । अहिलेपनि प्रत्येक घरमा कल (ट्युवेल) छैनन् । मोरङ पथरी शनिश्चरे वडा नं. ८ का धेरैजसो स्थानमा पिउने पानीको समस्या छ ।
हाललाई केही राहत होस भन्ने ठानेर वडा कार्यालयले १२ थान कल वितरण गरेको छ । आइतबार वडाले संयुक्त रुपमा प्रयोग गर्नेगरी १२ थान कल वितरण गरेको वडा अध्यक्ष बाबुराम दाहालले बताउनुभयो । ८÷१० घरका मानिसले एउटै कलको पानी पिउनुपर्ने बाध्यतालाई कम गर्न वडाले खानेपानी ट्युवेल जडान शीर्षकमा १ लाख रुपैया विनियोजन गरेको दाहालले बताउनुभयो ।
२०३५÷०३६ सालमा झोडा फाडेर बसेको बस्तीले शुक्रबारे देखि केही तल्लो भागमा रहेको कुवाबाट पानी पिउने गरेको स्थानीय रमेश खतिवडाले बताउनुभयो । कुवाको पानी पनि सुकेपछि ३ वर्ष अघिदेखि सामुहिक रुपमा कलको पानी पिउन थालेको खतिवडाले बताउनुभयो । सामुहिक रुपमा ७ घरले एउटै कल प्रयोग गर्दा निकै समस्या थियो । अब वडाले कल सहयोग गरेपछि ४ घरले संयुक्त रुपमा प्रयोग गर्ने खतिवडाले बताउनुभयो । कल गाड्ने ठाउँमा पानी नआउने भएपछि १ सय मिटर टाडा कल गाडेर पानी लानुपर्ने बाध्यता रहेको खतिवडाले बताउनुभयो ।
खतिवडा जस्तै मंगलबारेका उमेश सुन्दासको पनि पिडा उहि छ । १ सय १० फुट सम्म कल गाड्दा पनि पानी आउँदैन । ४ घरले मिलेर एउटै कल प्रयोग आएका थियौँ, अब २ घर मिलेर एउटा कल चलाउछौँ । वडाले धेरै सहयोग गरेको छ – सुन्दासले भन्नुभयो ।
वडाले १ लाख रुपैयामा एउटा कुवा सफाई र १२ कल, सो कलमा लाग्ने सम्पूर्ण सामग्री सहयोग गरेको छ । कल गाड्ने जिम्मा उपभोक्ता आफैले व्यहोर्नुपर्ने वडा सचिव लिलाराज भट्टराईले बताउनुभयो ।
