फागुन ५ , इटहरा ।
प्रबेश बिष्ट
सरस्वती मावि इटहराको स्वर्ण जयन्ती समापन समारोहमा गायक रामकृष्ण ढकालको उपस्थित हुने भएका छन् । फागुन २ गतेबाट सुरु भएको स्वर्ण जयन्तीको फागुन ६ गते हुने समापनमा गायक ढकालको विशेष प्रस्तुति रहने विद्यालयले जनाएको छ ।
१ नम्बर प्रदेश सरकारका सामाजिक विकास मन्त्री जिवन घिमिरे प्रमुख अतिथि रहेने कार्यक्रममा गायक ढकाललाई विशिष्ट अतिथिको रुपमा आमन्त्रण गरिएको विद्यालयका शिक्षक एवं स्वर्ण जयन्ती समारोह समितीका सदस्य थिरनाथ दाहालले बताउनुभयो । यस भेगमा सुगम संगितका पारखी श्रोताहरु धेरै भएकाले गायक ढकालको प्रस्तुति राखिएको शिक्षक दाहालको भनाई छ ।
सामुदायिक विद्यालयको ऐतिहासिक कार्यक्रममा सुगम संगितलाई ब्राण्ड बनाएर आफूलाई आमन्त्रण गरिएकोमा गायक ढकालले प्रसन्नता व्यत्त गर्नुभयो । समारोहमा आफ्ना एक दर्जन जति गीतहरु गाँउने उहाँले जनकारी दिनुभयो ।
स्वर्ण जयन्ती समापन समारोहमा मन्त्री घिमिरेले ५० आँै वर्ष गाँठको स्मारकका रुपमा निमार्ण गरिएको स्वर्ण जयन्ती प्रवेश द्वारको समुद्घाटन गर्नु हुने छ । यसैबीच स्वर्ण जयन्ती स्मारिका लोकार्पण र सिभिल इन्जिनियरिङ कार्यक्रमको घोषणा गरिने पनि जनाइएको छ ।
