केशव निरौला, पथरी
छोरा प्रतीक काठमाडौँको अमृत साइन्स क्याम्पसमा स्नातक तह (बि.एस्सी.) दोस्रो वर्षमा पढ्छन् भने जेठी छोरी प्रतिमा कक्षा ११ र कान्छी छोरी प्रतिज्ञा नै कक्षा आठमा पढ्छिन् । यी तीन सन्तानका ४८ वर्षीय बाबु आफैँ अहिले कक्षा ११ मा नियमित विद्यार्थीको रूपमा अध्ययनरत छन् भन्दा अलि अनौठो लाग्न सक्ला । तर, मोरङको पथरीशनिश्चरे”१ मा रहेको पञ्चायत माविमा अध्ययनरत छत्रबहादुर खड्काको वास्तविकता यस्तै छ ।
विद्यालयले यसै वर्षदेखि कक्षा ११ मा कानुन समूहका विषयहरू पठनपाठन गर्न थालेपछि २०२८ चैत्र २१ गते भोजपुरमा जन्मिएका छत्रबहादुरको जीवनले नयाँ मोड लिएको हो । काठमाडौँकै पशुपति माविबाट २०४७ सालमा प्रवेशिका उत्तीर्ण गरेपछि ठप्पप्रायः रहेको उनको उच्च शिक्षा अध्ययनको यात्रा बल्ल यसवर्षदेखि पुनः अगाडि बढेको छ । २०५३ सालमा रूपा कार्कीसँग विवाह बन्धनमा बाँधिएका छत्रबहादुर ५ वर्षसम्म भारतको नयाँ दिल्लीमा रेक्युरिटी गार्ड भएर रहे भने केही वर्ष मलेसियामा रोजगारी गर्नसमेत गए । मलेसियाबाट फर्केपछि सन्तानको लालनपालन र शिक्षादीक्षामा समय बिताउन थालेका खड्काले पछिल्लो समयमा लेखापढीको व्यवसाय अँगाल्दै आएका छन् । वर्तमान जीवन अवस्था र अध्ययन सन्दर्भ समेट्दै छत्रबहादुर भन्छन्– ‘मैले त एक प्रकारले औपचारिक अध्ययनलाई इतिश्री गरिसकेको थिएँ तर घरनजिकै कक्षा ११ मै कानुन विषय पढ्ने मौका आउँदा पुनः निरन्तरता दिएको हुँ । साधारण लेखापढी गर्नुभन्दा पनि पछि अधिवक्ता बन्ने चाहना राखेर सधैँ विद्यालय आई अध्ययन गरिरहेको छु ।’
पथरीशनिश्चरे नगरपालिकाको वडा नं. ४ मा लेखापढी गर्दै आएका स्थानीयवासी छत्रबहादुरको भावी योजना भनेकै अधिवक्ता बन्ने छ । सन्तानलाई पढाउँदाको सन्दर्भमा पनि आफूप्रति पढ्ने भाव अझ जागेर आएको उनको कथन छ । अन्य विद्यार्थी सरह दैनिक बिहान ६ बजे पाँच किलोमिटरको साइकल यात्राबाटै खड्का पनि नियमित विद्यालय आउने गरेको विद्यालयका प्रधानाध्यापक अर्जुनकुमार बुढाथोकी बताउनुहुन्छ । प्रअ बुढाथोकी भन्नुहुन्छ–‘कानुन समूहको कक्षा ११ मा अध्ययन गर्ने विद्यार्थीहरूमा कोही अन्य विषयमा स्नातक उत्तीर्णसमेत छन् भने दस जना विद्यार्थीको उमेर ३० वर्षभन्दा माथिको छ । यस्तै विद्यार्थीमध्येका छत्रबहादुर पनि एक हुन् जसले जीवनमा अध्ययनको महत्त्व बुझेको छ ।’
अध्ययनलाई उमेरसँग तुलना गरिनु हुन्न र सिकाइ जीवनपर्यन्त चलिरहन्छ भन्ने बुझाइमा अगाडि बढेका छत्रबहादुर खड्कालाई आफ्ना सन्तान सरहका विद्यार्थीसँगै बसेर पढ्नमा कुनै पनि प्रकारको अप्ठ्यारो छैन । बरु, उमेरको हिसाबमा अरूको अभिभावकजस्तो भएकाले सबै विद्याथीमाझ अध्ययनको मियो उनेको छत्रबहादुरको कथन छ ।
पूर्वी मोरङमै सामुदायिक विद्यालयतर्फ पहिलो पटक पथरीशनिश्चरे १ मा रहेको पञ्चायत माविले यस वर्षदेखि सुरु गरेको कानुन समूहको अध्ययनमा विद्यार्थीको अत्यधिक आकर्षण छ । अधिकतम ५५ जना विद्यार्थीलाई मात्र भर्ना गर्ने भनिए पनि विद्यार्थीको चाप बढ्दा अहिले ७० जनाको सङ्ख्यामा विद्यार्थी भर्ना भएको विद्यालय स्रोतले जानकारी दिएको छ । कानुनसँगै यहाँ विज्ञान, सिभिल इन्जिनियरिङ, व्यवस्थापन, मानविकी र शिक्षा समूहको पढाइ हुने गरेको छ ।
