सुनसरीको धरानस्थित वीपी कोइराला स्वास्थ्य विज्ञान प्रतिष्ठानमा उपचारका लागि पुगेका एक बिरामीलाई कोरोना भाइरस संक्रमण नभएको चिकित्सकले बताएका छन् ।
ज्वरो र घाँटी दुखेर उपचारका लागि पुगेका उनलाई प्रतिष्ठानको मेडिसिन विभागका चिकित्सकले कोरोना भाइरस संक्रमणको आशंकामा गत बिहीबार काठमाडौंको टेकु अस्पताल रिफर गरेको थियो ।
टेकु अस्पतालमा डाइग्नोसिस गर्दा उनको सेतो रक्त कोषिका बढेको, फोक्सोको केही भागमा संक्रमण भएको र उच्च रक्तचाप भएको पत्ता लागेको रिपोर्ट चिकित्सकले दिएको बिरामीका श्रीमतीले बताएकी छन् ।
उनले भनिन, ‘अस्पतालमा कुनै आइसोलेशन वार्डमा नराखी जनरल वार्डमै राखेर उपचार भइरहेको छ । आज शनिबार नै डिस्चार्ज दिने तयारी भएपनि चिकित्सकले नभ्याएर अहिलेसम्म डिस्चार्ज भएको छैन ।
उनले प्रतिष्ठानमा एक्सरे र रगतको जाँच समेत गरेको तर, चिकित्सकहरुले फोक्सोको एक भागमा संक्रमण भएको र सेतो रक्त कोषिका बढेको समेत पत्ता लगाउन नसकेर कोरियाबाट आएकै भरमा कोरोना भाइसरको शंका गरेर अनावश्यक झमेला दिएको बताइन् ।
उनले सञ्चारमाध्यमले पनि कोरोना भाइरस संक्रमण भएजतिकै प्रचार गरेर झन तनाव दिएको गुनासो गरिन् ।
