नरेस कुमार लाभ, विराटनगर
विश्व शान्तिका लागि खाकी बाबाको तपोस्थल मानिएको रामजानकी मन्दिरमा शिव शक्ति महायज्ञ लाग्ने भएको छ । यज्ञको तयारी अन्तिम चरणमा पुगेको छ । माघ १८ गते देखि २६ गते सम्म संचालन हुने महायज्ञका लागि अवश्यक टेण्ड, पण्डाल, यज्ञ कुण्ड (मन्दिर) निर्र्माणको अन्तिम चरणमा पुगेको मन्दिर व्यवस्थापन समिति अध्यक्ष सुर्यलाल यादवले जानकारी दिनुभयो ।
विराटनगर १३ मा रहेको रामजानकी मन्दिरमा प्रत्येक ५/७ वर्षमा विभिन्न यज्ञहरु लाग्दै आएको र यो वर्ष शिव शक्ति महायज्ञ लगाउने तयारी भएको यादवले जानकारी दिनुभयो । यज्ञमा नेपाल र भारतबाट लाखौँको संख्यामा भक्तजनहरु आउने भएकाले सबैलाई अटाउनका लागि व्यवस्थापनको काम भइरहेको छ । ९ दिन सम्म चल्ने महायज्ञमा रामलिला तथा विभिन्न भगवानका झाकीहरु पनि देखाइने यादवले बताउनु भयो । १८ गते कलश यात्रा भएकाले तिव्रगतिमा तयारी भइरहेको यादवको भनाइ छ ।
महायज्ञका लागि करिब १० लाख लागत अनुमान गरिएको समितिका कोषाध्यक्ष शंकर थापाले बताउनुभयो । सो रकम विभिन्न ठाउँहरुमा सहयोग संकलन गरेर, दाताहरुबाट जुट्ने सहयोगबाट व्यवस्थापन गरिने थापाको भनाइ छ । मन्दिर व्यवस्थापन समितिले व्यवस्थापनको जिम्मा लिएको र महायज्ञका लागि सबैकुराहरु यज्ञकर्ता भारतबाट आएका बाबाजीहरुबाट नै हुने थापाको भनाइ छ ।
भारतका विभिन्न स्थानहरुमा एकसय शिव शक्ति महायज्ञ सम्पन्न गरेको र अव १०१ महायज्ञ राम जानकाी मन्दिरमा गर्न लागेको आयोजकले जानकारी दिए । शिव शक्ति महायज्ञ नेपालमा पहिलो भएको पनि आयोजकको भनाइ छ । महायज्ञका लागि वाराणसी (वनारस) बाट ‘‘श्री श्री १०८ संत शिरोमणि सिद्धि महाकाल मौनी बाबा’’ आउनुभएको छ । ४० वर्ष देखि नबोलीकन मौन रहनुभएकाले उहाँको नाम मौनी बाबा रहेको उहाँका चेलाहरुले जानकारी दिए । प्रवचनका लागि पनि वाराणसीबाट आचार्य संजय झा आउने आयोजकले जानकारी दिएको छ ।
वि.सं. २००७ सालमा भारतमा खाकी बाबा आएर तपस्या गरेकाले गर्दा हाल रामजानकी मन्दिर भएको स्थानलाई खाकी बाबा तपोस्थल भन्ने गरिन्छ । त्यस समयमा जंगल र बाँसघारी रहेको थियो । खाकी बाबाको मृत्यु पश्चात सो क्षेत्रमा समय समयमा नेपाल तथा भारतबाट बाबाहरु आउने गरेका छन् ।
