भीमराज अधिकारी, पथरी
कम्युनिष्ट आन्दोलनका धरोहर पुराना कम्युनिष्ट चिन्तक दाताराम लुइटेलकोे आज १३ औँ दिनको पुण्य तिथि सकिएको छ । पथरी शनिश्चरे ६ हिलेटोल निवासी लुइटेलको ८८ वर्षको उमेरमा यही पौष २८ गते निधन भएको हो । उहाँको १३ औँ दिनको पुण्य तिथिमा पारेर एक औपचारिक कार्यक्रमको आयोजना गरी परिवारजनले साँडे ४ कठ्ठा जमिन सार्वजनिकीकरण गरेका छन् ।
सो कार्यक्रमका प्रमुख अतिथि रहनुभएका क्षेत्र नं. २ ख का प्रदेश सांसद लिलाबल्ल्भ अधिकारीले पुराना कम्युनिष्ट चिन्तक गुमाएको स्मरण गर्नुभयो । विद्यार्थी आन्दोलन ताका गाउँका जमिन्दार पञ्चहरुसंग डटेर लड्ने योद्धा गुमाएको भन्दै आगामी पुस्ताले उहाँको जीवनीबाट निकै कुरा सिक्नुपर्ने बताउनुभयो । अधिकारीले भन्नुभयो ‘‘हसन्दह क्षेत्रमा कम्युनिष्टको विजारोपण गर्दै समाज रुपान्तरणमा निरन्तर लाग्नुभएका दाताराम लुइटेलको योगदान चिर स्मरण रहने छ । यस क्षेत्रमा जमिन्दार आन्दोलन चलाउने योद्धा नै दाताराम लुइटेल हुनुहुन्थ्यो उहाँलाई हामीले गुमायौँ । यो १३ औँ दिनको पुण्य तिथिमा उहाँप्रति भावपूर्ण श्रदाञ्जली अर्पण गर्दछु ।’’
आगामी दिनमा उहाँको योगदानको कदरका लागि लुइटेल स्मृति उत्थान मार्फत आफुले गर्नुपर्ने सम्पूर्ण सहयोग गर्न तयार रहेको पनि अधिकारीले बताउनुभयो । अब समितिले सो जग्गामा के बनाउने, कस्तो बनाउने सम्पूर्ण डिपिआर तयार गरेर यही चैत्र सम्ममा बुझाए आफुले आउने आर्थिक वर्षको बजेटमा समाबेस गर्ने पनि अधिकारीले प्रतिवद्धता व्यक्त गर्नुभयो । सो डिपिआरका लागि वडा र नगरले सहयोग गर्न पनि अधिकारीले अनुरोध गर्नुभयो ।
जेठा दाजु स्व. हरि प्रसाद, आमा स्व. विष्णुमाया र स्व. बाबु दाताराम लुइटेलको स्मृतिमा सो जग्गा सार्वजनिकीकरण गरिएको कार्यक्रमका अध्यक्ष एवं साइला छोरा नरनाथ लुइटेलले बताउनुभयो । हिजो १२ औँ दिनमा जुठो सकेर आज १३ औँ दिनका दिन केही सामाजिक काम गर्ने सोचका साथ जग्गा सार्वजनिक गरिएको लुइटेलेल बताउनुभयो । खोटाङ जिल्लामा रहँदा पनि स्कुल स्थापना गरेर आफैले अध्यापन गराउने, सार्वजनिक स्थानमा कुवा खनाउने जस्ता थुप्रै सामाजिक काममा उहाँ सक्रिय रहेको स्मरण लुइटेलले गर्नुभयो । लुइटेल स्मृति उत्थानका लागि गोविन्द लुइटेलको अध्यक्षतामा १७ सदस्य कार्यसमिति तयार गरिएको छ । संविधान सभा सदस्य चण्डी प्रसाद राई प्रमुख सल्लाहकार रहनेगरी ७ सदस्य सल्लाहकार समिति र कृष्ण प्रसाद लुइटेल संयोजक रहनेगरी ११ सदस्य व्यवस्थापन समिति समेत गठन भएको नरनाथले बताउनुभयो ।
सो अवसरमा मोरङ जिल्ला समन्वय समिति सभापती नरेश पोखरेलले आफु विद्यार्थी आन्दोलनका बेला दातारामसंगै बसेर योजनाहरु बनाउने, संगै बसेर समाज रुपान्तरणका कुराहरु गर्ने गरेको स्मरण गर्नुभयो । कार्यक्रममा वडा नं. ६ का अध्यक्ष जयबहादुर तामाङले आफ्नो वडा भएकाले सो सार्वजनिक क्षेत्रको विकासका लागि सकारात्मक भूमिका निर्वाह गर्ने बताउनुभयो ।
