भीमराज अधिकारी, पथरी
‘‘समृद्ध नेपाल सुखी नेपाली’’ भन्ने नारालाई सार्थकता दिनका लागि विदेश छाडेर नेपालमै कृषिमा रमाउनेको संख्या दिनदिनै बढ्दै गएको छ । लाखौ लगानी गरेर कृषि पेशामा लागेता पनि सरकारी अनुदान नपाएको गुनासो जताततै बढेर गएको छ । कृषिको अनुदान साच्चिकै सहि कृषकमा नपुगेको गुनासोको चाङ गाउँ गाउँमा छन् । यस्तै गुनासो मोरङ पथरी शनिश्चरे ५ का भिम प्रसाद गिरीको पनि छ ।
११ वर्ष खाडीको तातो घाममा पसिना बगाएका गिरीले २०६३ सालमा ३० हजारको लगानीमा बोइलर कुखुरा पाल्न सुरु गरेका थिए । विस्तारै आम्दानी बढ्दै गएपछि गिरीले कुखुरा र त्यसका लागि आवश्यक संरचना थप्दै गए । हाल ६० लाख बराबरको लगानीमा भोटेघुम्ती कृषि फर्मका नाममा बंगुर फर्मपनि संचालन गरेका छन् । हाल फर्ममा गिरी परिवारका ६ जनाले आफै दिनरात मेहनत गरिरहेका छन् । गिरी परिवार बाहेक अन्य २ जनाले पनि रोजगार पाएको गिरीले बताए । अहिले विदेश छाडेर बसेका २ भाइ छोरा, बुहारी र श्रीमान, श्रीमती सबै फर्ममा खट्ने गरेको गिरीले सुनाए । अहिले सबै खर्च कटाएर वार्षिक ६ देखि ७ लाख सम्म बचत हुने गरेको गिरीको भनाइ छ ।
यति खर्च गरेर कृषि फर्म चलाइरहदा पनि अनुदानको कुनै पनि रकम नपाएको गुनासो छ गिरीको । ‘यत्रो लगानी गरेर खटेका छौँ खै अनुदान भनेको रेडियो, टिभीमा मात्रै सुनियो । कसले खान्छ अनुदान ? अनुदान लिन कति लगानी गर्नुपर्ने हो ? केही बुझिएन ।’ गिरीले भने ।
हाल ३ हजार वढी बोइलर कुखुरा रहेका छन् । यस्तै अहिले बंगुर पनि २२ वटा माउले सरदर १० वटा बच्चा जन्माउने गरेका छन् । ३ महिना पछि बंगुरको भुनी, बुच्चा ६ हजार देखि ८ हजार सम्ममा बिक्री हुने गरेको छोरा सुजन गिरीले बताए । मासुका लागि नभएर बच्चा उत्पादनकै लागि आफुहरुले माउ पाल्ने गरेको गिरीको भनाइ छ । उन्नत जातका २ वटा बीर आफैले पालेको गिरीको भनाइ छ । हाल खोरमा हेमसायर, ड्योग र योगसायर जातका बंगुर छन् । यी बंगुरहरु २ के.जी सम्मको हुनेगरेको सुजनको भनाइ छ । सबै बंगुरहरुको बिमा गरिएको गिरीले बताए । करिब १ बिगाहा क्षेत्रफलमा फैलिएको फर्ममा अब बाकीँ रहेको जग्गामा तरकारी र अझै फर्म थप्ने योजना रहेको गिरी परिवारले बताए । अहिले सक्कली किसानले भन्दा पनि जनप्रतिनिधीकै सेटिङमा नक्कली किसानले कागज मिलाएर अनुदान झ्वाम पार्ने गरेको कृषकको गुनासो छ ।
तस्वीरमा भोटेघुम्ती कृषिफर्म
