पथरी, मगरहरुको नयाँवर्ष ५०१४ को अवसरमा मगर संघ पथरी शनिश्चरे नगर कमिटिले भव्य कार्यक्रम तयारी थालेको छ । नयाँवर्षको अवसर पारेर मगरहरुको सांस्कृतिक कार्यक्रमहरु गर्ने तयारी भएको नगर मगर संघले पत्रकार सम्मेलन गरेर जानकारी दिएको हो ।
माघ १ गते माघे संक्रातीको अवसरमा पथरी शनिश्चरे १ मोरङमा रहेको मगर गुम्बामा कार्यक्रमको तयारी गरिएको संघका नगर सचिव खगेन पुलामी मगरले जानकारी दिए । कार्यक्रममा गुम्बा निर्माणका लागि तिहारमा खेलिएको देउसी भैलो, हुर्रा नाचका कालाकारहरुलाई पनि सम्मान गरिने मगरले जानकारी दिए ।
मगरहरुको आफ्नो संस्कृति सन्ततिहरुलाई हस्तान्तरण गर्ने, नयाँ वर्षको अवसरमा शुभकामना आदान प्रदान गर्ने, रमाइलो गर्ने गरी कार्यक्रमको तय भएको संघका नगर अध्यक्ष टंक राना मगरले जानकारी दिए । मानव सभ्यताको विकास हुने क्रममा आफ्ना पुस्ताहरुले जंगलमा कन्दमूल, तरुल लगाएतका खानेकुरा खाएर नयाँ वर्ष मनाउने गरेको इतिहाँस रहेको मगरले जानकारी दिए । सोही अवसरमा अहिले पनि माघ १ गते माघे संक्रातीको अवसरमा मगरहरुले आफ्नो नयाँ वर्ष मनाउदै आएको मगरले बताए । सरकारले माघ १ गते थारु समुदायको माघीपर्व भनेर सार्वजनिक विदा दिएको भएता पनि मगरहरुलाई भने सम्बोधन नगरेकोमा अध्यक्ष मगरले आपत्ती जनाए । आउने वर्षहरुमा सरकारले मगरलाई पनि सम्बोधन गर्नुपर्ने बताए ।
कार्यमहरु के के छन् ?
बिहानको समयमा गुम्बामा पुजापाठ गर्ने र प्रसाद ग्रहण गर्ने कार्यक्रम तय भएको मगर संघ युवा कमिटिका अध्यक्ष भूवन पिठाकोटे मगरले बताए । विहान १० बजे नगर प्रमुख दिलिप कुमार राईको प्रमुख आतिथ्यतामा कार्यक्रमको उद्घाटन गरिने, कार्यक्रममा लक्की ड्र गराइने र सो लक्की ड्र मा सहभागी हुनका लागि रु. २ सयको टिकट काट्नुपर्ने पनि मगरले बताए । सो लक्की ड्र को बिजेतालाई २५ हजार बराबरको मोबाइल, अन्य पुरस्कारहरुमा साइकल, स्टेन फेन, आइरन, राइसकुकर, इलेक्ट्रिक जग, घडी लगाएत रहेका छन् । कार्यक्रममा छेलो, हण्डीफोर, माला दौड, चम्ची दौड, इन आउट लगाएतका खेलहरु रहेका छन् । कार्यक्रममा नगरका १० वटै वडाबाट मगर जातीहरुले आफ्ना विभिन्न नाच, झाँकीहरु प्रदर्शन गर्ने मगरले बताए । हुर्रा, कोडा लगाएतका नाचहरु देखाइने बताइएको छ । कार्यक्रममा एकल महिला, जेष्ठ नागरिक लगाएतलाई सम्मान गर्ने समेत कार्यक्रम तय भएको छ । कार्यक्रमका लागि ५ लाख ५० हजार लाग्ने अनुमान गरिएको छ । सो रकम सदस्यहरुबाट लेवी उठाउने, विदेशमा रहेका मगरहरुले सहयोग पठाउने र नगरसंग पनि प्रस्ताव गरिएको मगरले बताए । पथरी शनिश्चरेमा ३३२ घर संघमा दर्तामा रहेको र अन्य समेत गरी १२ सय घरपरिवारको हाराहारीमा मगरहरु रहेको संघका अध्यक्ष मगरले जानकारी दिएका छन् ।
