पथरी, नेपाल जेसीज बर्ष २०२० को राष्ट्रिय अध्यक्षमा पथरी जेसीजका संस्थापक अध्यक्ष जेसी अशोक शंकर विजयी भएका छन् ।
शुक्रवार चितवनको रत्ननगरमा सम्पन्न जेसीजको ४६ औं राष्ट्रिय महाधिबेशनले पथरी शनिश्चरे मोरङका जेसी शंकरलाई निर्वाचित गरेको हो । नवनिर्वाचित शंकरले अध्यक्षका दुई प्रत्यासी अरुणेश्वर खनाल र विकास मानन्धरलाई पराजित गरेका हुन् । १ हजार ५ सय ६५ मतदाताले गरेको मतदानबाट शंकरले ५ सय ५१ मत प्राप्त गरे । पराजित विकास मानन्धरले ४ सय ८७ र अरुणेश्वर खनालले ५ सय २७ मत प्राप्त गरेका थिए । चितवनको बीसहजार जेसीजबाट खनालले र काभ्रे जेसीजबाट मानन्धरले उम्मेदवारी दिएका थिए ।
कार्यकारिणी उपाध्यक्षमा सिनेटर विजय गुरुङ, जेसी शोभा खरेल, जेसी गोकुल सापकोटा, लालमणी भण्डारी निर्वाचित भएका छन् । महाधिबेशनमा देशभरिका १ सय ५१ वटा शाखाका युवाहरुको सहभागिता रहेको थियो । महाधिबेशनको पूर्व प्रधानमन्त्री तथा नेकपाका अध्यक्ष पुष्पकमल दाहालले उद्घाटन गरेका हुन् । जेसीजको ४६ औँ राष्ट्रिय महाधिबेशन पुस ९ गतेदेखि १३ गतेसम्म चितवनको रत्न नगरमा जारी छ ।
उनलाई जिताउन दमक उद्योग वाणिज्य संघ, पथरी उद्योग बाणिज्य संघ, पथरीमा अशोक शंकर जिताउ अभियान समिति लगायत समितिहरु क्रियाशिल भएको थियो । पथरी जेसीजको सिंगो टिम आफ्नो संस्थापक अध्यक्ष शंकरलाई जिताउन अभियानमा संलग्न भएका थिए ।